Saturday, January 22, 2011

و مرت سنة أخرى ...

2010

بالنسبة لى مرت هذه السنة كما لو لم تكن أكثر من مجرد نسمة !!

بدأت و انتهت قبل أن ألحظ ذلك .. و لا أعقد بأنى استطعت أن أنجز فيها شئ

ممكن دى حاجة وحشة أنى محسش بانجازات انا عملتها السنة اللى فاتت , ممكن عشان مجرد ما بتحط لنفسك مجموعة أهداف لازم تحققها خلال السنة دى , أنت بتحبس نفسك

و تدريجيا كل حماسة السنة الجديدة هتروح بعد أول أسبوع .. و شهر شهرين يعدواا و هتنسى كل اللى أنت كنت عايز أو ناوى تعمله السنة دى ..

اترك نفسك حرآ طليقآ .. لآ تقيد نفسك ّ~

أنا شايفة أن الواحد لازم يحقق أى شئ هو مقتنع بيه و بيحلم بيه .. لازم تحس أحلامك عشان تحققها و تعيشها

محدش هيقدر يقولك أنت هتشتغل ايه و لا فين و لا امتى .. انت اللى تقدر تقول لنفسك أنا ان شاء الله هحقق أحلامى بجهدى أنا و من غير ما تكون مجرد خطة من خطط السنة الجديدة المركونة على الرف ...

عملت ايه فى 2010 ؟؟

انجازاتى تتراوح بين السعيد و الحزين .. السخيف و الجاد ,, بس كلها ذكرياتى اللى مهما كانت أنا فخورة بيها ..

عرفت أكتر عن الحياة و الناس اللى فيها ... و أعتقد أن أكبر الفضل يرجع لجامعتى , اللى خلتنى أقابل ناس مختلفة منها الحلو .. جدآآ , و الوحش .. جدآآآّ !! دخلت فيلم هارى بوتر و ده بالنسبة لى انجاز طبعا و حدث تاريخى فى السنة دى فرحت و ضحكت , زعلت و عيطت ... بس قررت حاجات كتيرة ..

قررت أعيش بحريتى و أستغل فرصى

قررت أن محدش هيحددلى طريقى .. أنا اللى هرسمه لنفسى

قررت أن محدش هيقولى أعيش ازاى .. أنا اللى هقرر بنفسى

قررت أنى مكتبش الحاجات اللى عايزة أعملها فى 2011 ؟؟

ليه ؟ عشان أكون حرة و أحقق أكتر من اللى ممكن كنت هكتبه

2010 ... شكرآ أنك علمتينى حاجات كتيرة

و عديتى زى النسمة