Wednesday, July 27, 2011

حُـزنْ و شَيخوخة مُبــكرة !



"ان الحزن المتكرر هو شيخوخة مبكرة"
محمد المنسي قنديل

أنا أول ما شفت الجملة دى اتخضيت كده .. يعنى أنا ممكن يعنى يجيلى شيخوخة مبكرة ؟ طيب كل اللى أنا زعلت عشانهم أو بسببهم هيعملولى ايه لما تجيلى الشيخوخة المبكرة .. أكيد و لا حاجة .. هيفرحوا و يمرحوا بشبابهم و أنا أقعد على كرسى العواجيز بشيخوختى المبكرة !!

فقلت فى نفسى كده "أنا مش هيجيلى شيخوخة غير فى وقتها ان شاء الله و دلوقتى هأبتسم و أرجع لطبيعتى .. مفيش فايدة أنى أفضل زعلانة و محدش هيفيدنى " و لا ايه ؟

و هحاول كل ما أزعل من حاجة أكتبها و كده مش هلحق أوصل للشيخوخة صح ؟؟


طيب بص بقى .. أنا زعلانة منك , و مش عايزة أكلمك و فى نفس الوقت عايزة أكلمك , فهمت حاجة ؟

طووويب , مش عايزة أكلمك عشان تعرف أنى زعلانة منك جامد , بس عايزة أكلمك عشان عايزة أكلمك .. فهمت بقى ؟ لأ ؟ طووويب =)

أنا حاليا حاسة أنى فى طريقى أبقى أحسن ,, و كل ما أحس أنى داخلة على دور اكتئاب , هفتكر أنى مش عايزة شيخوخة مبكرة !!

Tuesday, July 26, 2011

إسفــنجة أنــا ..


أنا اسفنجة ..

طبعا عارفين الاسفنج .. أيوون الكائن اللى بيمتص الميا ده !! أنا ده بقى =)

بس مش بمتص ميا و لا ملونة و لا فيا خروم كتيرة ..

بس بمتص !!

بمتص الألم و المشاكل .. بمتص الفرح و السعادة !!

بفضل أمتص و أمتص ..

بس لو عصرتنى هيخرجلك ألم و مشاكل مضاعفة .. زى ما هيخرجلك فرح و سعادة مضاعفة

بس ده على حسب ...  أنت خليتنى أمتص ألم و لا سعادة ؟

Sunday, July 24, 2011

نفــسى فــى بـيــت ..


بحلم ببيت يكون بتاعى أنا , كل تفصيلة صغيرة فيه أنا اللى عملاها , و ليها ذكرى معايا ..

أحلم ببيت .. تجد على بابه ورود طبيعية ما تزال تعبق برائحة عطرة و أغيرها يوميا .. بيت صغير و "على قدى" .. بمجرد أن تدخل تقابلك رائحة الياسمين و الورد البلدى أحيانا و البخور فى أحيان أخرى .. غرفة الجلوس فيها أريكة كبيرة ضخمة .. مزينة بوشاح وردى و مخدات كثيرة بعدها على شكل فراولة و قلوب و أخرى على شكل مربعات .. و لا يزال كتابى ملقى عليها من قراءة أمس .. التلفاز موجود و لكنه مغلق معظم الوقت .. و هناك ترى فازة من الورد الوردى يطل عليها نور قادم من الشباك المفتوح "بحب النور الربانى" .. شباكى هذا تتدلى حوله ستائرى الوردية و البيضاء , التى تزين شبابيك البيت كله ..  

تطأ قدماك سجاد ناعم صغير على شكل دائرة أحيانا و أحيانا أخرى على شكل مربعات صغيرة .. و أحيانا من القطيفة الوردية الناعمة .. و أحيانا أخرى لا و لكنها تكون ناعمة أيضا .. تزين حائطى صورى و أهم ذكرياتى , كذلك قد تجدها مترامية فى جميع أنحاء المنزل .. تقابلك أثناء تجوالك قطتى البيضاء الصغيرة التى أحلم ان أربيها , و تجد سريرها الصغير فى ركن بغرفة الجلوس و طبعا لا أنسى جزئى المفضل فى تلك الغرفة و هو الكرسى الهزاز .. و كذلك مكتبتى العزيزة  التى تحوى خلاصة تجميعى للكتب على مر السنين ..أمللت ؟ لكنك لم ترى باقى البيت بعد ّ فلنختصر غرفة الجلوس .. لنذهب لجزئى المفضل و هو "البلكونة"

البلكونة هى تقريبا أكبر غرفة بالمنزل .. و يظلها "تندة" لتقينى من أشعة الشمس و عيون المتلصصين .. و تملأها أوانى الزرع , من ياسمين و ورد بلدى و فل و دوار الشمس , يتوسطها كرسى كبير مريح .. مزخرف بالورود و عليه وشاح ألفه حولى فى الليالى الباردة , و أمامه طاولة صغيرة أضع عليها شرابى البارد و شئ أكله و كتاب يسلينى فيها , و طبعا هناك "ركن المناسبات", و هو ركن سأبتكره و يكون مخصص لكل مناسبة لأضع فيها شئ من صنعى , أو شئ خاص بتلك المناسبة و له ذكرى خاصة لى ..

و فى جزء أخر من الغرفة "افتكروا أنها أكبر غرفة فى البيت" .. توجد منطقة عملى , مكتبى الأبيض الصغير و كرسيى الأبيض و عليها مخدات مريحة تهون جلوسى الطويل عليها .. تحت مكتبى أدراج تجمع كل كتبى المتعلقة بالعمل و فوقه أجندتى الصغيرة التى تحوى كل شئ تقريبا , من مواعيد هامة لكلمات أعجبتنى و أنا خارج المنزل , و بجانبى وردتين مقطوفتين حديثا .. و بعض اوراق الجرائد و المجلات .. و مصباحى الصغير .. و راديو صغير , أشغل عليه شرائط فيروز أو أستمع الى قناة عشوائية ..  و لعب صغيرة تزينه و مجى الوردى ..

غرفة نومى .. و هى مملكتى الخاص , يجب من يدخلها أن يذهل من لونها الوردى و سريرى الضخم و عليه ما لا يقل عن 10 مخدات بمختلف الأحجام و فوقه سيجد بعض أرفف الكتب عليها كتبى المفضلة أو أكثرها قراءة ... و دبادبيى و عرائسى مرصوصة على الأرض بجوار الشباك المفتوح بستائره المرفرفة .. سريرى ستجد عليه الاب توب مركونا على جنب و مفتوح معظم الوقت للتصفح .. و على طاولة جانبية ستجد مصباح و كوب من عصير كنت أشربه و منبهى الذى لا يوقظنى معظم الوقت و على الآخرى هاتفى و مناديلى و مفاتيحى و كل ما هو مهم لى .. و على الحائط هناك صور أكثر من تلك فى غرفة الجلوس , و أيضا هناك لوح خشبى لتعليق الذكريات أو نوتات ذات معنى أو رسمة أو النتيجة بأيامهما المهمة , و ستجدوان خزانات تحتوى ألبومات صورى و أشياء خاصة مضى عليها الزمن .. و فى جانب دولاب لبسى و عليه مرأة بحجمى , فى ناحية ملابسى معلقة و فى رف فوق كل اكسسواراتى , هداياى القديمة , شنطى , و كل شئ .. و طبعا تسريحتى التى أفضلها صغيرة و"على قدى برضة" .. و عليها أهم أشيائى الخاصة .. و طبعا سجادتى الوردية هى أهم شئ , و أريد كراسى صغيرة ناعمة لصديقاتى الاتى سيزرننى  .. طبعا لن أنسى تعليق بعض البوسترات و الفراشات و الورود هنا و هناك :)

جولتك لم تنتهى بعد !! .. مطبخى الصغير , هو حيث تناول الطعام على طاولتى الخشبية و نقشاتها التى تشعرك بقدمها رغم انها جديدة و كرسييها المشابهين , مطبخ صغير يحتوى الأساسيات و لكن لا يخلو من وردات هنا و هناك .. و لوحة صغيرة جميلة تزينه و بعض كتب الطبخ .. فأنا اتوقع لنفسى حتى بعض مرور سنوات طويلة سأظل مبتدئة فى بعض أمور الطبخ ..

سترى ان بيتى يغلب عليه اللونين الأبيض و الوردى , و ستجد أن أكثر ما يقابلك الورود و الكتب و الصور و الذكريات .. من يعرف ما قد يقابلك أيضا ...

فقط نفسى فى بيت .. بيت يكون كل تفصيلة صغيرة فيه أنا اللى عملاها !


"بوست طويل أووى صح =)"

Saturday, July 23, 2011

أريد أن أكون أميرتكـ


أميرة ؟ .. نعم أميرة , ما المانع ؟

قد تحسبنى أتمنى أن أكون أميرة , تتوج بتاج من الألماس و الأحجار الكريمة و تطفو فى فساتين من الحرير و تتطاير فوق بتلات الورود , محاطة بالخدم , تلك تسقيها الماء و أخرى تدلك قدميها و غيرها تهتم بشعرها المسترسل , أميرة يصطف طالبى الزواج أمام القصر و يأتون أفواجآ كل يوم و أنا أرفضهم جميعا انتظار لأمير أحلامى ..

قد أكون مثل سنو وايت , جمالى الخلاب يجعل زوجة أبى تحاول التخلص منى و أقزام سبع يساعدوننى , و أمير يقع فى غرامى ..

قد أكون مثل سندريلا , جمالى يجعل زوجة أبى تحبسنى , و تساعدنى جنيتى و حيواناتى , و أمير يقع فى غرامى ..

قد اكون مثل أريل , جمالى يجعل تلك تغار منى و أتخلى عن صوتى لها فقد لأكون مع أميرى الذى يقع فى غرامى أيضا ..

قد أكون مثل بيل , أعيش مع وحش و أغيره للأفضل و بالتالى أكتشف أنى أحببته , و بذلك يصير أمير فيقع فى غرامى ..

قد أكون مثل ياسمين .. فتاة متمردة جميلة , تقع فى حب فتى عادى فيصير فى نظرها أميرا ليقع فى غرامها ..

لاحظت أن كلهم ينتهون بالأمير الذى يقع فى الغرام صحيح ؟

فلو كنت أنا أميرتك .. فأنت أميرى !!

و لكنى لا أريد كل هذا .. أريد قلبك و حنانك فقط .. أريدك لى دائما .. تشعرنى بوجودك حولى فى السراء و الضراء .. لا تشعرنى بمرور الزمن و لا تشعرنى بالمشاكل التى ستصيبنا معا .. أريد ضحكاتك.. أريد مشاركتك لى فى عيد ميلادى و ذكرى زواجنا ما بعد الخمسين .. أريد أولاد يشبهونك بقدر ما يشبهوننى .. أريد أحاديث طويلة مع كوب من العصير فى هواء منعش معك .. أريد أن نجلس و نقرأ معا و أختلس نظرات إليك لأجدك تفعل المثل .. أريد كعكات نصنعها معا بحبنا .. أريد فطورا صباحيا مليئا بالحب و شعورى أنا اودعك لتذهب لعملك لأكون فى انتظارك و أنت تعود منه .. أريد رحلاتنا معا .. أريد أن أساعدك فى عملك و أخفف العبء عنك .. أريد أن أشعر بحبك لى ينبض فى قلبك بعد سنوات و سنوات .. أريد أن أكون أميرتك و ستجد انك أصبحت ملكى و أكثر ..

فقط أريد أن أكون أميرة متربعة على عرش قلبك ..

Friday, July 22, 2011

الضغط و السكر و الذى منه !!


لاحظت مؤخرا أنه لا بد من أنى لا أفقه شيئا فى السياسة .. هذا صحيح , فكيف لحكومتنا المبجلة التى تعرف كل شئ بدءآ بعدم وجود قناصة و انتهاءآ باستبعاد وزراء لشئ الحكومة تفعله "عينى عينك" ..كيف لى أنا أن أعارضها و أتسائل كيف تم هذا و ذاك ..

حكومة مجمل تصريحاتها "قول اللى فى نفسك و برضة مش هنعمله" , حكومة أنت كشعب تطلب شيئا فينفذوا شيئا أخر لم يكن فى الحسبان "حاسيين بينا و ملهوفين علينا" , حكومة لن تقوى على فهمها , لأنها لم تتوصل لذلك بعد !!

حكومتى العزيزة , كام سؤال صغير يضافوا الى مجموعة الأسئلة التى أنا على يقين أنها بدأت تتكدس امام مكتب "الحكومة" .. مش عمو مبارك بطل حربى و عايزين تعملولو جنازة عسكرية , طيب ليه ميتحاكمش عسكرى بالمرة , و لا أقولكو اقتراح أحلى , ليه متحاكمش أصلا ؟ .. سؤال وحش صح ؟

طيب نروح لحاجة أسهل , لماذا تلقون بتصريحات تتنافر و تتشابك و فى النهاية لا تتوافق مع بعضها البعض , فلان يطلع فى قناة يقول "احنا أوقفنا كذا و كذا .." و فلان أخر يطلع على قناة اخرى فى نفس ذات التوقيت لينفى ما قاله فلان الأولانى .. إلخ إلخ إلخ من المواقف الطريفة , أنا متأكدة انكو عايزين تعملوا جو فرفشة بما اننا مخنوقين و عايزين تغيير بقى , بس مش شايفين كده أوفر .. بقيتوا أرخم من مسلسلات رمضان !!

اممممم , ده وحش ؟ اللى بعده ..

الدكتور حازم عبد العظيم , يهيألى أن موضوعه غريب نوعا ما , فها انتم لا تقبلونه كوزير "لاشتباهه بالتعامل مع شركة اسرائيلية" بينما حكومتى العزيزة مخلية اسرائيل "منورة بفلوسنا .. غاز و كهربا و كل ما يشتهوه " .. فى تفسير و لا أنا هفضل أسأل كتير ؟

سؤال أخر .. اسم مبارك و المنشآت العامة !!

لما من الأساس ينسب أى شئ له ؟ لم يكن بطل حرب "بلاش فشر و الكلام اللى حاطينه فى كتب التاريخ" و لم يكن رجل يفخر به شعبه .. بالعكس خلعوه "بالجزمة" .. لماذا إذا سيعود إسمه على الميادين و المنشأت العامة .. هو عمل حاجة جديدة و أنا معرفش ؟ يعنى اكتشف نوع غيبوبة جديد فى شرم الشيخ ؟ أو استضاف السياح ؟ مانا لازم أفهم هو عمل ايه ؟

قتلة الثوار و محاكماتهم "أو بالأصح عدم محاكمتهم" .. و ترقيتهم فى حالات أخرى و براءتهم .. بجد يا حكومة ده أكتر موقف حبيتك فيه !!

لاحظت قد ايه خايفين على شعب مصر و حقوق الشهداء , يعنى واحد زى "من دون ذكر أسماء" (الكومى) اللى قتل الشهداء يتم ترقيته و ياخد مرتب أضعاف أضعاف اللى بياخده .. دى مكافأة و لا فى خطة خمسية جديدة للتخليص على الشعب المصرى ؟ و غيره من اللى لم يتم محاكمتهم أصلا , و اللى اتحاكموا و طلعوا براءة .. و طبعا مش هتكلم عن الوزراء السابقين اللى طلعوا زى الشعرة من العجين .. ورقة بيضا يا أخواتى , ايه الحلاوة دى ؟

حكومتى العزيزة .. هل انتى هتتحملى تكاليف دواء الضغط اللى انتى جبتهولى ؟?

Tuesday, July 19, 2011

عِندما حآولتْ رَسمــك



بعواصف رملية و رياح ثلجية ..

 رسمتك

بعشق غجرى و حب عفوى ..

رسمتك

برقصة مجنونة و أنغام موزونة ..

 رسمتك

بلهفة انتظارك و فرحة لقاؤك ..

 رسمتك

بألوان حبى و فرشاة قلبى ..

رسمتك

بأسطير قدام و رؤى فى المنام ..

رسمتك

بهمهمة الأطفال و كلمات الكبار ..

رسمتك

بألوان همجية و مشاعر غير اعتيادية ..

رسمتك

بحبى و شوقى , بغضبى و سعادتى ..

رسمتك ..

Sunday, July 17, 2011

مشروع كتاب المئة تدوينة ..




عاملين ايه يا حلوين :)
تمااام ؟ كويسييين ؟
كويس عشان انا جاية عايزة منكم طلب ..
vote تعملولى
شفتوا سهلة ازاى ؟
لو كنتو عملتو فعلا .. يبقى شكرا جدا جدا ليكو و اكتشفو باقى البوستات , فى كمية تدوينات رائعة
و لو مكنتوش عملتوا ... مستنين اييييه بقى ؟؟
اقروهم .. و لو عجبوبكو اعملولى فووووت ^_^
يلا يا شطااار .. و لو ليكم تدوينات مشاركين بيها حطوها عشان اعملكم فوووت انا كمان :)

http://100posts-voting.blogspot.com/2011/07/blog-post_8532.html

http://100posts-voting.blogspot.com/2011/07/blog-post_2213.html

http://100posts-voting.blogspot.com/2011/07/blog-post_3987.html

http://100posts-voting.blogspot.com/2011/07/blog-post_3618.html


Saturday, July 16, 2011

عاطـفية أنــا ..


غاضبة أنا .. عنيدة أنا .. متطلبة أنا ..

عزيزى عليك أن تعرف , شفائى فى تلك الحالات الكلمات الناعمة الهادئة و احتوائك لى ..

لن تفيدنى التحليلات العلمية أو الأسباب المنطقية ..

لن يفيدنى معرفة من بدأ ماذا و كيف حدث هذا .. ستفاجأ عندما تعرف أن ما قد يفيدنى "كلمتين حلوين يهدونى و خلاص" ..

غريبة أنا .. مختلفة أنا .. متطلبة أنا ..

ربما, و لكن عزيزى هكذا أنا ..

عقلانى أنت , و لكن عاطفية أنا !!~

Thursday, July 14, 2011

Mischief Managed =)


10 سنين و أكتر من حياتى هيخلصوا فى ساعتين أو أقل ..

هارى بوتر بالنسبة لى كان أكتر من مجرد كتاب ممتع و فيلم مسلى كل سنة و خلاص .. القصة بالعالم ده اللى اندمجت فيه و تخيلتنى جزء منه أكتر فأكتر مع كل جزء من الكتاب .. شفت هارى و رون و هيرموينى و هم بيكبروا , شفت سيريوس و دمبلدور و جيمس و ليلى و سناب و غيرهم و هم بيموتوا .. شفت ناس شريرة بتبقى طيبة و ناس طيبة بتبقى شريرة , حسيته عالم مستقل بذاته و بقت هوجوورتس هى المكان اللى بحلم أزوره ..

هارى .. علمنى أنى أبقى شجاعة و مخلصة

رون .. علمنى أنى أكون وفية و أن الأصحاب اللى بجد بيفضلوا مع بعض

هيرميونى .. علمتنى أن الذكاء ميزة حلوة فى الشخص

جينى .. علمتنى أن يكون ليا كلمة و موقف

فريد و جورج .. علمونى أنى أضحك =)

دمبلدور .. علمنى أن عادى أن الشخص يغلط , المهم هيصلح غلطته ازاى

لونا .. علمتنى أن يكون عندى ثقة بنفسى

نيفيل .. علمنى أنك تقدر تكون أى حاجة أنت عايزها بس لو حاولت

بسببهم حبيت النضارات و الشعر الأحمر ,حبيت المدارس و الكتب و القراية , حبيت ان يكون عندى هوس بحاجة معينة طوال 11 سنة , و للأسف رغم أن أخر فيلم خلاص وصل

بالنسبة لى سحر هارى بوتر لسة مخلصش ..

الذكريات ممكن بعضها أنساه , ممكن انسى أجزاء كتيرة من القصة , ممكن مضحكش تانى على نفس الحاجات ,بس الحماس قبل كل فيلم و كتاب و الفرح و الحزن بعد كل نهاية مش هتتنسى , بالنسبة لى دى البداية ,  أنى هنقل الحكاية دى لأولادى ..

عارفة أن ناس كتير هتضحك , و فعلا فى ناس كتيرة ببتريق عليا عشان الموضوع ده بس انا مؤمنة ان هارى بوتر ده أخر جزء من طفولتى و ناوية أخليه يكمل معايا ان شاء الله ..

فيه ذكريات كتيرة خدتها من كل فصل فى كل كتاب و كل فيلم .. بس أهم حاجة ,

أنا فخورة انى كنت من جيل هارى بوتر

"Mischief Managed"

Monday, July 11, 2011

التحريــر لسـة بخيــر



رغم أن الجو حر جدا و لا يطاق .. بس أقدر أقول أن التحرير و الثوار لسة بخير

اليوم بدأ بداية غريبة .. كنت رايحة المحطة و وقفت عشان أشترى جرايد , فجبت بتاع  التحرير , و الراجل بتاع الجرايد قاللى حاجة غريبة جدا "إوعى يكون اللى هتجيبيه التحرير" .. كنت لسة هرد عليه برد مؤدب "إشمعنى , ماله التحرير؟" أو فى حالة إنه زود أقوله "وإنت مالك؟" .. بس بصيتله و لقيته بينظر شزرا , و شكله مش مهيأ أنى أقوله الرد المؤدب أو اللى مش مؤدب , و منسيتش أنه بيتفوق عليا فى عنصرين المكان و اللمّة (الناس اللى حواليه يعنى) .. قمت أنا اديته الفلوس و خدت الجرنان و مشيت .. و للعلم الجرنان ده مقريتوش لأنى نسيته فى المحطة , بس ما علينا ..

لما ركبت القطر , و لقيت ناس كتيرة بتشكر فى الثورة , فرحت جدا .. سواء ست كبيرة بتقول "و الله بقيت على طول بتفرج على التليفزيون عشان عايزة أشوف ولادى فى التحرير" و ولد و أصحابه رايحين بخيم للتحرير عشان يباتوا .. و غير الناس اللى بتدعى للى فى التحرير .. فكرت "التحرير لسة بخير"

... هقطع كل اللى حصل قبل التحرير لأنه بيتلخص فى (حر , تراب , حر , تراب .. إلخ )

ونوصل لمرحلة التحــــــــــريـــــــــر !!

المشهد بهرنى , علما بأنى مقدرتش أروح التحرير من أول ما الثورة بدأت و كان نفسى أروح يوم جمعة بس أهو أحسن من مفيش خالص , بس بجد اتبسطت أووى , من الهتافات , و الناس اللى بتتكلم , و الخيام , و عربيات كل حاجة ابتداءا من المية لحد التين الشوكى , و مجموعات تتكون من 10 و أكثر فى كل حتة بيتكلموا و بيتناقشوا , ده غير كمية أعلام مصر و الشعارات المرفوعة فى كل حتة فى الميدان ..

بس أكتر حاجة عجبتنى , التفتيش , هى أه بدأت تبقى مستفزة لما كل شوية أطلع البطاقة و أتفتش لكن معنديش مانع و كنت فخورة بالحركة دى , حسيت قد ايه هم خايفين على الناس اللى جوا .. قلت فى نفسى مستحيل دول يكونوا بلطجية ,

و قلت تانى .. "التحرير لسة بخير"

Friday, July 8, 2011

و هنوصل لإيه ؟



يوم التدوين ضد الطائفية و التعصب

التعصب .. رغم إختلاف أشكاله و أنواعه الا أن أشهره و أخطره "الدينى" و بالذات هنا فى مصر .. للأسف

من الحاجات اللى لفتت انتباهى فى البداية للموضوع ده هو فيلم حسن و مرقص .. و رغم أنى فيه حاجات محبيتوش فيها .. بس حسيت أنه بين الصفات العامة للطرفين سواء مسلمين او مسيحيين ..و من قبل ما أشوفه الموضوع ده مكنش بيشكل ليا مشكلة شخصيا

بس بعدها بدأت أركز و لاحظت قد إيه احنا ناس غريبة و متناقضة ..

نقول كلنا مصريين بس لما تيجى تتكلم عن حد مسيحى , تقول هو كذا و كذا حلو جدا بس مسيحى ..

بتتكلم عن المسيحيين و كأنهم مش بشر زينا .. مش مصريين زينا , بالعكس احنا أجدادنا أقباط ..  المصريين فى الأصل أقباط . إيه المشكلة يعنى ؟

و تلاقى ناس بتتعامل مع حد حلو جدا .. تعرف انه مسيحى تتقلب 180 درجة .. طيب الديانة بتفرق معاك فى ايه .. مأنت من شوية كان عاجبك جدا ّ!!

و الأمر نفسه للمسيحيين .. بس ربما ده بسببنا كمسلمين ان احنا وصلنالهم الاحساس "بالاضطهاد" فبقوا بيتعاملوا خوفا فى أوقات و ساعات حذرا و توقع الخيانة فى اوقات أخرى

إحنا مصريين .. و عايزين نغير من نظام , يبقى لازم نغير من نفسنا !!

مش لازم تبقى فيه أزمة هى اللى تجمعنا .. ليه منتجمعش دايما .. ليه ميكونش المسلمين و المسيحيين ايد واحدة مش مجرد شعارات واخدانا بيها الحماسة و بنكررها و خلاص ..

بس الصراحة لو جينا للحق .. الأحداث الأخيرة دى كان ليهم حق الاحتجاج بسببها , من اول السنة و هم مشاكل بتحصلهم شوفوا السنة دى كم كنيسة حصلت فيها مشكلة و لا حد رجعلهم حقوقهم و شوفوا مواضيع كاميليا و عبير اللى قلبت الدنيا .. و المشكلة احنا مش بنحاول نفهم , نقولك فتنة طائفية و ننسى إنهم مصريين , و نرد عليهم و بطريقة أعنف .. و بعدين ؟؟!!

لو فضلنا نرد على بعض .. بعدين ؟

مش مهم مين اللى بدأ صدقونى و لا مهم مين اللى إستمر .. المهم هنوصل لفين ؟

ربنا يحمينا مسلمين و مسيحين مصريين .. 

Wednesday, July 6, 2011

حين كانت الحياة أبسط ..



سبعينات ..

يعنى اللون البرتقالى اللى هو كان أشهر لون وقتها .. يعنى البناطيل الشارلستون و الجزم اللى كعبها متر دى .. يعنى تسريحات الشعر العجيبة و الألوان الأعجب منها .. يعنى ديسكو و الأغانى, و يعنى التون جون , Bee Gees ,  Abba و الكبير الفيس بريسلى طبعا .. يعنى تان تان و ميكى جيب فى أزهى عصورهم .. يعنى الألعاب البدائية .. يعنى الهيبيز .. يعنى بنى أدمين طلعوا القمر .. يعنى الست بقى ليها دور فى المجتمع .. يعنى The Godfather .. يعنى ألعاب الأتارى ..يعنى حاجات حلوة كتيرة مخليانى عايزة أعيش فى الزمن ده ..

أنا متخيلانى فى السبعينات جدا .. أكتر مانا شايفانى فى الألفينات ..

متخيلانى لابسة بينك فى بينك و عاملة تسريحة عجيبة .. و بسمع أغانى أعجب !!

متخيلانى بسمع ريترو و ديسكو و الأشياء الغريبة دى .. و ده اللى بعمله حاليا فعلا ..

متخيلانى مستمتعة جدااا =) ممكن عشان العصر ده فى تخيلى كان مسلى جدا و مرح جدا و ملون جدا .. ياترى .. إيه العلامة اللى معلمة معاكو و فى دماغك و أول ما تفتكروا السبعينات بتفتكروها على طول ؟؟


 دول مغنيين كوريين و عملين أغنية على رتم أغانى السبعينات و هما اللى خلونى أدمن السبعينات أكتر!!


عايزة طقم زى ده .. بس البنطلون بينك بقى .. أووف على الألوان D=


أنا عايزة من ده يا حزمبول ^_^


هم كانوا بيعملوا ايه غير الرقص .. D: