Sunday, November 20, 2011

نقطة و من أول الثورة !


أنتـ/ى مصريـ/ة؟

فلنفترض لذلك .. فلنفترض انكم مصريون فى الصميم و ما سأقوله سيهمكم حقا

أنتم لديكم أخوة , أب , أعمام وأقارب بشكل عام أليس كذلك ؟ .. فلنفترض ان أخيك نزل يشارك فى ثورة , و لا بلاش ثورة .. ينزل يشارك فى مظاهرة صغنتوتة كده , عشان حاسس أنه مش واخد حقه ..

هتقول عليه إيه ؟

أ‌- عميل و بيتكلم إنجليزى كويس اوى

ب‌- ماسونى و يهودى و ملحد شيوعى كافر

ت‌- أجندة أجنبية بتمويل مريخى

ث‌- جدع و بيجيب حقه

طبعا لو قريبك هتقول عليه أخر إجابة دى صح (لو مكنتش ندل مع قرايبك يعنى!) , و طبعا لو التليفزيون المصرى إتكلم عنه و عن المتظاهرين معاه بحاجة وحشة , هتقول كدابين , دوول عمرهم ما يعملوا كده ..

طوووويب .. فلنفترض ان نفس الموقف إتكرر بس مش مع حد قريبك , هل هيكون نفس رد فعلك ؟ أنا بتكلم عن الناس اللى متابعين التلفزيون المصرى فقط لا غير (واللى متابعين غيره وحياتك!).. طبعا هتختار إجابة من التلاتة الأوائل و هتصدق التليفزيون و هتقول "مش هيرتاحوا غير ما يخربوا البلد"

طيب أنت عاجبك كده ؟

أنت شايف أن المظاهرات او الثورة بوظت البلد ؟ بذمتك مين اللى بيبوظ دلوقتى ؟

هتقولى مفيش امن ؟ هقولك ماهو فيه شرطة أهو .. و لا البلطجية دول قاطعين إشتراك , و الثوار و الشعب دول "كخة"

هتقولى عجلة إستقرار ؟ هقولك إدى الناس دى أبسط حقوقها و هيشتغلوا أكتر من الأول , لما مصابيهم يتعالجوا , و شهدائهم حقوقهم ترجع , ويحسوا انهم بيتم التعامل معهم كبنى أدمين !

النهاردة شفت صورة المدون مالك مصطفى اللى فقد إحدى عينيه , و قلبى اتقطع عليه .. و لا أعرفه و لا يقربلى حاجة , بس حسيت أن اللى عمله ده عشانى و عشان ناس كتيرة ممكن تكون فى بيتها بتشتم فيه .. بسبب إعلامنا القذر !

و إسم مالك ده كمثال , حصيلة الاصابات النهاردة 600 و مازالت فى تزايد و عدد القتلى وصل لـ4 !

ليه ؟ دول ذنبهم إيه فى الحياة ؟ إعتصامهم كان سلمى تماما , و حق مشروع ليهم , بلاش تقولوا بيعتصموا ليه .. ما يخلو البلد تمشى !

الثورة لم تنتهى , و المجلس اللى هيجى بعد الانتخابات الجاية دى , هيكون 100% غير ممثل للشعب !

كل اللى بعمله دلوقتى كمصرية , و مش مهم مسلمة او مسيحية , أيا كان تيارى السياسى , بدعى للثوار و بدعى على اللى عمل كده فيهم .. كل ظالم له نهاية , بس للأسف هم لا يتعظوا

عندى طلبات بسيطة منكم:

- أرجوكم الاعلام المصرى .. فلندعى له بالشفاء أو الحرق !

- مصابين الثورة جميعا .. فلندعى لهم بالشفاء

- شهداءها فلندعى لهم بالرحمة

- و ثورتنا فلندعى لها بالاكتمال ..

و لو فاتتك ثورة 25 يناير , فنصيحة أن تبدأ بالنزول , دى "الإعادة"

Friday, November 18, 2011

هــو و هــى ..



هى: أنا أحبك

هو: حقا

هى: نعم كثيرا

هو: حسنا ..

...

هى: إشتقت لك .. أين كنت؟

هو: كنت منشغلا

هى: لا بأس

..

هى: أين كنت؟

هو: كنت خارجا .. لماذا؟

هى: لا .. لا شئ

..

هى: أريد ان احكى لك شيئا

هو: أنظرى أولا لهذا الاعلان .. رائع أليس كذلك؟

هى: نعم, رائع ..

..

هى: أنا حزينة فعلا

هو: لما الحزن .. انتى تكبرين الموضوع !

هى: حسنا ..

..

هو: أنا أحبكِ

هى: حقا؟

هو: نعم كثيرا

هى: حسنــا !

...

فضفضـة و أشيـاء أخـرى ..



أيام الفضفضة .. وحشتنى جدا

كنت بكون عندى كلام و أعرف أفضفض و أتكلم , و لكن حاليا يبدو أن موهبة "الفضفضة" اختفت او تآكلت أو حصلها شئ ما , لأنى لم أعد أستطيع أن أحكى عن أبسط حاجة حصلتلى

و مثلها مثل كل شئ أخر .. كان عندى و راح !

المذهل هنا أنى لم أدرك أنى امتلك تلك الصفات أو المواهب أو أيا كان اسمها , حتى لاحظت اختفائها .. و كنت أعتقد أنها أشياء مسلم بها فى أنا , و ليس من الممكن ان تذبل بمرور الوقت , أمثلة ؟

الفضفضة , القدرة على تمالك الأعصاب و الهدوء , التفاؤل , القدرة على الاتيان بحلول أخرى و بسرعة , القدرة على الكتابة بسهولة (الأفكار مكنتش بتخلص!) , و القدرة على تنظيم الوقت .. إلخ !

طبعا يبدو من كلامى أنى دلوقتى أصبحت كائن هلامى لا يقوم بأى شئ مفيد فى الحياة .. لأ انا بقوم بس مش بيعجبنى اللى بقوم بيه ! عايزة أعمل حاجة اكون مقتنعة باللى بعمله , و عايزة أحس انى كائن مفيد .. بلاش للبشرية لأنها كبيرة أوووى .. أكون كائن مفيد لنفسى !

هل هقدر ؟

Themesong: Bon Jovi - It's My Life

أنصحكم بسماع الأغنية دى .. فهى علاج مثالى لحالات الاكتئاب و فقدان الثقة بالنفس :)


Wednesday, November 16, 2011

حــذاء ..



يقولون أن حذاء جديد يعوضك عن فقدان الحبيب

إذن لماذا أظل أسأل نفسى ..

هل سيعجبه ذلك ؟ .. مع كل حذاء أراه