وصفة للسعادهـ

جرعة من مساعدة الغير دائما +

تظل فى نطاق يسمح لك ان تظل ملهما , فمن يستطيع أن يعيش بدون إلهام؟ +

حس الهدوء و السلام الداخلى و الاعجاب بكل ما هو جميل حولك +

ممارسة ما تحب و ما تجيد فعله حقآ +

القراءة .. عالم سحرى جديد بين يديك +

التقليل من مشاهدة التليفزيون +

أحب ما تعمل .. لتعمل ما تحب +

تمرينات , مهما كانت بسيطة :) +

مواجهة مخاوفك و ما يقلقك .. أول بأول +

أن تثق بنفسك و بقدراتك +

أن تظل قريبا من عائلتك و أصدقاؤك المقربين +

فلتظل قريبا من الله +

فلتدع قلبك يقودك .. و لا تنسى عقلك أيضآ =

سعادهـ مؤكدهـ

أنت حلو زى ما أنت ..

مش هتعرف تبقى حد تانى غير نفسك ..

نفسى الناس تفهم .. انك مش لازم تمثل عشان الناس تحبك , و مش لازم تمشى مع الموضة عشان تبقى "كوول" و عندك شلة صحاب حلوين .. لازم هتلاقى حد على الاقل بيحبك كده زى ما أنت ..

مهما كنت .. اعترف بصفاتك .. سواء كانت حلوة احتفظ بيها , أو مش حلوة و حاول تحسنها

و متغيرش من نفسك أبدا عشان حد .. اللى عايزك هيقبلك "بسلطاتك و بابا غنوجك :) "

خليك واضح من البداية و متمثلش .. أنت مش مجبر قدام حد أنك تتصرف حسب طريقة معينة هما عايزنها ..

أنا اكتشفت دى بعد ما خدت بالى أن الكيان الشرير اللى اسمه الجامعة ده .. بدأ يغير منى !!

هنا خدت وقفة و قلت لأ .. مش أنا اللى هتغير

أنا بنت بحب أشترى الهابى ميل فى الخباثة عشان أخد اللعبة

أنا بنت بحب أتفرج على أفلام رومانسية و أتخيل نفسى مكان البنت اللى فيها

أنا واحدة اكتر حاجة بحبها فى حياتى القراءة .. حتى لو فضلتو تتريقوا عليا لحد أخر يوم فى عمرى

أنا واحدة بحب أسمع أغانى و أتخيل نفسى بغيها و الناس بتصقفلى

أنا واحدة مش بعرف أفتح كلام بس لو فتحت معايا كلام فى موضوع عاجبنى ممكن أتكلم 3 أيام متواصلة

أنا بنت طوول عمرى بحب أقعد مع نفسى و مع عدد محدود من الاصحاب أصحاب العقول المشابهة ليا

أنا بنت بحب أكل الايس كريم براحتى لحد ما يسيح و يبقى مية كده

أنا بنت بحب بشدة و بكره بشدة معنديش وسط Ya Black or White

أنا بنت عندى صفات كتيرة نص اللى حواليا ميعرفوهاش بس معنديش مانع بحب يكون عندى أسرارى

أنا واحدة بتفرج على الكارتون لحد دلوقتى .. كله !!!

أنا بنت متقلبة المزاج أووى .. بس سر سعادتى بسيط .. شوية اهتمام و حب "كتير شوية" يفرحونى

أنا بنت بسمع أغانى كورى و يابانى .. و اتريقوا لبكرة بقى ;)

أنا بنت عنيدة أكتر من العناد نفسه ^^

أنا عندى صفات أكتر من كده  .. و مش هغيرها لآنى فخورة بيها و دى صفات كونتنى و خلتنى ما انا عليه دلوقتى , و لو غيرتها او فكرت أغيرها عشان حد هزعل أووى ^^

خليك واثق من نفسك و صفاتك و متغيرش من نفسك .. استنى اللى هيقدر صفاتك دى

و على رأى مكى "متحاولش تبقى أى حد تانى غير نفسك"

:) 

فـى أمـــل

لآ تستسلم ..

ممكن كلمة بنسمعها كل يوم ..

 و كتير أووى بنطنشها .. على أنها حاجة للتشجيع و السلام

بس لو أنت بجد فى كل مرة اتقاللتلك الكلمة وقفت و فكرت ..

"أنا مش هستسلم .. هحاول تانى و تالت و رابع"

بجد هتحس بفرق كبير أوووى أووووووووووووى فى حياتك

و كان فى حكمة بحبها ... "بما انى مش فاكرة الحكمة هجيب جملة من أغنية كارتون بتدى نفس المعنى"

-الهزيمة فى فقدان الامل .. و لا يكفى أن تقول أريد-

أعتقد مش محتاجة أشرح .. بس محدش يستسلم

افتكروا أهم انجازتكم .. الناس اللى فى يوم استفادت منكم .. الحاجات الجميلة فى حياتكم

أكيد دى كلها و أكتر حاجات ممكن ترفع من معنوياتكم ^^

و على رأى الست فيروز : "ايه فى أمل :) "

*ملاحظة انى بقالى فترة بكتب تدوينات قصيرة .. مش عارفة هى بتطلع حلوة و لا أحلى أنى أرجع أكتب تدوينات أكبر .. على العموم أنا بس أخلص امتحانات و هفضى للمدونة دى :)*

أنت الحياة و الحياة أنت ..

...

أنت الحياة و الحياة أنت

محدش هيخلى حياتك أحلى .. غيرك أنت

فى ايدك تخليها حلوة من أول ما تصحى

و فى ايدك تخليها سودة لحد ما تنام ..

هتختار ايه ؟؟ تصحى الصبح بابتسامة و تحمد ربنا و تعيش الحياة؟

و لا تصحى الصبح مهموم و قرفان و تقول انا قمت ليه و ازاى ؟

تصحى و تقرر تعمل حاجة حلوة و مفيدة ..؟؟

و لا تصحى و تقول دى عيشة غم بلا نيلة .. !!

الحياة .. هى أنك تعمل نفسك بنفسك ..

و محدش يقدر يعملك دى غير نفسك 

....

هُـــــــدوء ..

هدوء ...

استرخاء ....

أحلى احساس لما تحس أنك أنجزت حاجة كبيرة أوووى كنت بتنام تحلم كوابيس عنها

و أحلى حاجة أنك تخلص الحاجة دى و تحس أن فى حمل كبير اتشال من عليك

لتقف فى الهواء البارد المنعش الليلى ..

و فى يدك كوب من العصير المنعش و قطعتان بالتحديد من الثلج

لا أكثر فيتحول طعم العصير لماء .. و لا أقل فيضيع احساس الانتعاش

تبدأ فى شرب كوب العصير ببطء ..

و تفكر فى أن كم أن الحياة جميلة لمجرد أنك أنهيت "حاجة كبيرة"

و تتأمل فى السماء و الهواء يداعب شعرك و وجنتيك

و تسرح بخيالك لدقائق تحسبها ساعات

و تفكر فى الارواح المعذبة التى لم تحظ بنفس الحظ الذى حظيت به انا

و أنسى أنى من لحظات .. كنت احدى تلك الارواح المعذبة

أشعر بالبرد قليلا لكن لا أبالى .. فهذ فرصة لا تتكرر كثيرا

بدأت أدقق فى السماء و ألاحظ أنها خالية من النجوم ..

 كم حظى تعس .. كم كنت أرغب فى تقليدهم كما يفعلون فى الافلام

و أبدأ أحصى النجوم .. لا يهم ^^

أنظر ليدى ...

لأجد أن قطعتا الثلج ذابتا بالفعل مع العصير ..

أضحك ..

و أعود للتأمل و الاستمتاع بالهواء المنعش الليلى

...

نفسى أفضل كده و ميكونش ورايا أى حاجة تانية كبيرة

^_^

حاجات صغيره

حاجات صغيرة ...

فى حاجات صغيرة بتفرحنا و مش بتحس قد ايه هى بتأثر معاك غير لما تحصلك

لما طفل صغير يضحكلك أو يمسك ايدك اووى

لما تكون ماشى فى الشارع أو واقف بتشترى حاجة و تلاقى ناس أنت مش عارفها بتبتسملك

لما تكون متضايق و نفسك تكلم حد .. و تلاقى حد يجى يكلمك و يهون عليك من غير ما تطلب

لما مامتك تقولك أنا فخورة بيك و تحس قد ايه هى بتحبك

لما تلاقى من كل الناس اللى انت عارفها فى عندك أصحاب بجد تقدر تقول عليهم أخوات و المواقف بتثبت

لما تحس أن ربنا راضى عليك

لما تحس قد ايه انت مهم بالنسبة للى حواليك

لما تحس ان مجهودك و شغلك بيطلع بفايدة

لما تحس أنك تقدر تحلم .. و أنك تقدر توصلل للى بتحلمه ده

لما تروح تنام و أنت فى دماغك مليوون حاجة حاسس أنك هتعملهم ان شاء الله

لما تلعب و تستمتع بوقتك و تكون على طبيعتك من غير ما يهمك كلام حد

لما تلاقى حد فاكر أصغر تفاصيل فيك و انت نفسك مش فاكر انك قلتهاله

لما تلاقى بين ايديك كتاب حلو نفسك فيه

لما تجيلك رسالة من صديق غير متوقعة و تخليك تفضل مبتسم اليوم كله

لما تحس انك قدرت تغير حد للافضل

لما تحس ان فى حد فعلا عاجباه شخصيتك من غير اى احكام مسبقة عليك

لما تشوف لحظة غروب أو شروق كاملة

لما متكونش محتاج تزود أى تزويق فى كلامك

لما تحس انك السبب فى ابتسامة شخص

لما تقعد تكتب و تكتب و أنت حاسس أن جواك أفكار مش بتخلص

لما تشترى هدية لحد عزيز عليك

لما تفتكر ذكريات قديمة و تشوف صورها

لما تتعلم حاجة جديدة انت حاببها

لما تسمع أغنية  تغير تفكيرك

لما تتعلم أكلة جديدة و حد يقولك دى أحلة حاجة أنا كلتها فى حياتى

فى حاجات تانية و أصغر و أكتر من كده ليا ..

بس هي دايما الحاجات الصغيرة اللى بتفرحنا كده

 ومهما كترت الحاجات الكبيرة اللى ملهاش لازمة .. لو حياتنا مفيهاش حاجات صغيرة

هنحس بطعمها ازاى ؟؟