أنتـ/ى مصريـ/ة؟
فلنفترض لذلك .. فلنفترض انكم مصريون فى الصميم و ما سأقوله سيهمكم حقا
أنتم لديكم أخوة , أب , أعمام وأقارب بشكل عام أليس كذلك ؟ .. فلنفترض ان أخيك نزل يشارك فى ثورة , و لا بلاش ثورة .. ينزل يشارك فى مظاهرة صغنتوتة كده , عشان حاسس أنه مش واخد حقه ..
هتقول عليه إيه ؟
أ- عميل و بيتكلم إنجليزى كويس اوى
ب- ماسونى و يهودى و ملحد شيوعى كافر
ت- أجندة أجنبية بتمويل مريخى
ث- جدع و بيجيب حقه
طبعا لو قريبك هتقول عليه أخر إجابة دى صح (لو مكنتش ندل مع قرايبك يعنى!) , و طبعا لو التليفزيون المصرى إتكلم عنه و عن المتظاهرين معاه بحاجة وحشة , هتقول كدابين , دوول عمرهم ما يعملوا كده ..
طوووويب .. فلنفترض ان نفس الموقف إتكرر بس مش مع حد قريبك , هل هيكون نفس رد فعلك ؟ أنا بتكلم عن الناس اللى متابعين التلفزيون المصرى فقط لا غير (واللى متابعين غيره وحياتك!).. طبعا هتختار إجابة من التلاتة الأوائل و هتصدق التليفزيون و هتقول "مش هيرتاحوا غير ما يخربوا البلد"
طيب أنت عاجبك كده ؟
أنت شايف أن المظاهرات او الثورة بوظت البلد ؟ بذمتك مين اللى بيبوظ دلوقتى ؟
هتقولى مفيش امن ؟ هقولك ماهو فيه شرطة أهو .. و لا البلطجية دول قاطعين إشتراك , و الثوار و الشعب دول "كخة"
هتقولى عجلة إستقرار ؟ هقولك إدى الناس دى أبسط حقوقها و هيشتغلوا أكتر من الأول , لما مصابيهم يتعالجوا , و شهدائهم حقوقهم ترجع , ويحسوا انهم بيتم التعامل معهم كبنى أدمين !
النهاردة شفت صورة المدون مالك مصطفى اللى فقد إحدى عينيه , و قلبى اتقطع عليه .. و لا أعرفه و لا يقربلى حاجة , بس حسيت أن اللى عمله ده عشانى و عشان ناس كتيرة ممكن تكون فى بيتها بتشتم فيه .. بسبب إعلامنا القذر !
و إسم مالك ده كمثال , حصيلة الاصابات النهاردة 600 و مازالت فى تزايد و عدد القتلى وصل لـ4 !
ليه ؟ دول ذنبهم إيه فى الحياة ؟ إعتصامهم كان سلمى تماما , و حق مشروع ليهم , بلاش تقولوا بيعتصموا ليه .. ما يخلو البلد تمشى !
الثورة لم تنتهى , و المجلس اللى هيجى بعد الانتخابات الجاية دى , هيكون 100% غير ممثل للشعب !
كل اللى بعمله دلوقتى كمصرية , و مش مهم مسلمة او مسيحية , أيا كان تيارى السياسى , بدعى للثوار و بدعى على اللى عمل كده فيهم .. كل ظالم له نهاية , بس للأسف هم لا يتعظوا
عندى طلبات بسيطة منكم:
- أرجوكم الاعلام المصرى .. فلندعى له بالشفاء أو الحرق !
- مصابين الثورة جميعا .. فلندعى لهم بالشفاء
- شهداءها فلندعى لهم بالرحمة
- و ثورتنا فلندعى لها بالاكتمال ..
و لو فاتتك ثورة 25 يناير , فنصيحة أن تبدأ بالنزول , دى "الإعادة"
