اللى بيسموه فالنتين :)

الفالنتين أو يوم الحب ؟؟

ايه فكرته يا ترى .. ليه بنستنى الحب فى اليوم ده بالذات ..

طبعا كلنا عارفين أو مش عارفين القصة القديمة بتاعة فالنتين دى فمش لازم أقولها , لانى مش جاية أتكلم عنها و مش جاية أديكم درس تاريخ , أنا جاية أتكلم عن الفالنتين و الناس اللى بتحتفل بيه

بالنسبة لى .. هو يوم رائع بجد

عشان انا بحب اللون الاحمر و الوردى , و لما تلاقى كل حاجة حواليك باللونين  طبيعى لازم تفرح :)

عشان بحب الورد و الدباديب , و عشان بحب أشوف الحبيبة مع بعض ^^

بس يا ترى ,, ليه الفالنتين ميكونش لكل حاجة ؟

ليه منقولش بحبك يا ماما , بحبك يا بابا , بحبك يا أخويا و أختى , بحبكو يا أصحابى

ليه لازم يكون لشخص واحد بس .. رغم أنه هو نفسه ممكن أصلا ميكونش فاكر اليوم ^_^

أنا بالنسبة لى الفالنتين , ده يوم الحب لكل حاجة ..

أحب فيه الجو , أحب فيه نفسى , أحب فيه لبسى , أحب فيه صوت العصافير , أحب ماما و هى بتنادينى و أخويا و هو بيضايقنى , أحب هزار أصحابى , أحب أقعد على النت , أحب أخرج و أغير جو , أحب أشوف الناس اللى فاهمين يوم الحب غلط , أو ممكن فاهمينو صح :) , أحب أشترى لنفسى هدية و كارت و ورد احمر كتير , أحب أكل أكلة أنا بحبها , أحب أجرب حاجة جديدة , أحب أشترى لنفسى أى حاجة كان نفسى فيها ..

أحب أقول : بحبك يا نفسى .. عشان أنتى اللى فضلتى معايا فى اليوم ده

ياريت بلاش نخلى يوم الحب لشخص واحد بس .. خلوه لكل حد

خلوا كل أيامكم فالنتين ,, خلوها كلها حب :)