للأسف هناك بعض الفئات فى المجتمع مقتنعة بنظرية أن كفاية كده ثورة بقى و لو عايزين تتظاهروا خلوها يوم الجمعة و بقية الأسبوع سيبونا "نشوف شغلنا".
أنا مش مقتنعة بنظرية ويكند الثورة دى أو ان خلاص الثورة خلصت و أى حاجة بتتعمل دلوقتى ملهاش لازمة و بتوقف حال البلد. غلطانين اوى من يعتقدون أن الـ18 فى السنة اللى فاتت هم دول الثورة, الثورة هى الأسابيع ’ الشهور و السنين التى تليها حتى تحقيق أخر هدف من أهداف الثورة.
معتقدش ان فى مانع أنها تستمر سنين بشرط أنها تكون ماشية صح, هتقولوا سنين؟ هقولكم أيوة الثورة الفرنسية استمرت 10 سنين و معتقدش دلوقتى نقدر نبص على فرنسا و نقول عجلة انتاجها خربانة أو حالها واقف.
الثورة يجب أن تستمر رغم مطالبات "المواطنين الشرفاء" بحرق المتظاهرين لأنهم موقفين عجلة الإنتاج المقدسة اللى بتقف وقت التظاهر بس أو لأنهم مش لابسين حلو أو ماركات فده دليل صارخ بأنهم بلطجية أو لمجرد أنهم مش مخليين المواطنين إياهم عارفين يخرجو و يتفسحو.. إلخ
بس ليه لأ؟ ليه منمشيش مع نظرية المواطنين الشرفاء؟ لنتظاهر لمدة يوم واحد و نعود باقى الأسبوع إلى نظام تعليمنا المشوه, إعلامنا المضلل, طعامنا المسرطن و مياهنا المخلوطة بالمجارى’ أمننا المنعدم, عدالتنا المفقودة, حريتنا المسلوبة, شبابنا االمحبوس, شهدائنا و مصابينا اللى حتى الأن ملهمش حقوق و كرامتنا اللى بقت فى الأرض... أليس هذا ما يريدون؟
لم لا نعود لحشو أدمغتنا بما يريدون’ لنركن أدمغتنا على الأرفف لـ30 سنة أخرى مادمتم متقبلين فكرة الإنتظار و مفرقتش سنة و 6 شهور من كام سنة بقى!
نعم فلنتظاهر يوم الجمعة فقط و نعود لبيوتنا فى المساء استعدادا للعمل, لكى لا يقال علينا شباب صايع ضيع البلد, لننسى كل من ماتوا و اتهمو و حوكمو زورآ, لننسى كل من سُحل و عُرى و مات, هم إيه اللى وداهم أصلا؟
مش كده!؟
