Sunday, November 20, 2011

نقطة و من أول الثورة !


أنتـ/ى مصريـ/ة؟

فلنفترض لذلك .. فلنفترض انكم مصريون فى الصميم و ما سأقوله سيهمكم حقا

أنتم لديكم أخوة , أب , أعمام وأقارب بشكل عام أليس كذلك ؟ .. فلنفترض ان أخيك نزل يشارك فى ثورة , و لا بلاش ثورة .. ينزل يشارك فى مظاهرة صغنتوتة كده , عشان حاسس أنه مش واخد حقه ..

هتقول عليه إيه ؟

أ‌- عميل و بيتكلم إنجليزى كويس اوى

ب‌- ماسونى و يهودى و ملحد شيوعى كافر

ت‌- أجندة أجنبية بتمويل مريخى

ث‌- جدع و بيجيب حقه

طبعا لو قريبك هتقول عليه أخر إجابة دى صح (لو مكنتش ندل مع قرايبك يعنى!) , و طبعا لو التليفزيون المصرى إتكلم عنه و عن المتظاهرين معاه بحاجة وحشة , هتقول كدابين , دوول عمرهم ما يعملوا كده ..

طوووويب .. فلنفترض ان نفس الموقف إتكرر بس مش مع حد قريبك , هل هيكون نفس رد فعلك ؟ أنا بتكلم عن الناس اللى متابعين التلفزيون المصرى فقط لا غير (واللى متابعين غيره وحياتك!).. طبعا هتختار إجابة من التلاتة الأوائل و هتصدق التليفزيون و هتقول "مش هيرتاحوا غير ما يخربوا البلد"

طيب أنت عاجبك كده ؟

أنت شايف أن المظاهرات او الثورة بوظت البلد ؟ بذمتك مين اللى بيبوظ دلوقتى ؟

هتقولى مفيش امن ؟ هقولك ماهو فيه شرطة أهو .. و لا البلطجية دول قاطعين إشتراك , و الثوار و الشعب دول "كخة"

هتقولى عجلة إستقرار ؟ هقولك إدى الناس دى أبسط حقوقها و هيشتغلوا أكتر من الأول , لما مصابيهم يتعالجوا , و شهدائهم حقوقهم ترجع , ويحسوا انهم بيتم التعامل معهم كبنى أدمين !

النهاردة شفت صورة المدون مالك مصطفى اللى فقد إحدى عينيه , و قلبى اتقطع عليه .. و لا أعرفه و لا يقربلى حاجة , بس حسيت أن اللى عمله ده عشانى و عشان ناس كتيرة ممكن تكون فى بيتها بتشتم فيه .. بسبب إعلامنا القذر !

و إسم مالك ده كمثال , حصيلة الاصابات النهاردة 600 و مازالت فى تزايد و عدد القتلى وصل لـ4 !

ليه ؟ دول ذنبهم إيه فى الحياة ؟ إعتصامهم كان سلمى تماما , و حق مشروع ليهم , بلاش تقولوا بيعتصموا ليه .. ما يخلو البلد تمشى !

الثورة لم تنتهى , و المجلس اللى هيجى بعد الانتخابات الجاية دى , هيكون 100% غير ممثل للشعب !

كل اللى بعمله دلوقتى كمصرية , و مش مهم مسلمة او مسيحية , أيا كان تيارى السياسى , بدعى للثوار و بدعى على اللى عمل كده فيهم .. كل ظالم له نهاية , بس للأسف هم لا يتعظوا

عندى طلبات بسيطة منكم:

- أرجوكم الاعلام المصرى .. فلندعى له بالشفاء أو الحرق !

- مصابين الثورة جميعا .. فلندعى لهم بالشفاء

- شهداءها فلندعى لهم بالرحمة

- و ثورتنا فلندعى لها بالاكتمال ..

و لو فاتتك ثورة 25 يناير , فنصيحة أن تبدأ بالنزول , دى "الإعادة"

7 comments:

  1. "الثورة لم تنتهى , و المجلس اللى هيجى بعد الانتخابات الجاية دى , هيكون 100% غير ممثل للشعب !"
    من اهم الحاجات اللى قولتيها بجد
    احنا فى جو لا يسمح بالانتخابات نهائى
    واللى لو اتعملت نتيجتها هتبقى مش فى صالحنا
    ولو مش اتعملت هتبقى ازمه مش فى صالحنا بردو

    اللى حصل النهارده ده ثوره من اول وجديد
    لان ولا حاجه من مطالب الثوره حصلت اصلا
    ولا حد فينا قدر ياخد ابسط حق من حقوقه المشروعه اللى المفروض ياخدها

    اما بالنسبه للتليفزيون المصرى
    فا شفائه امر مفقود الامل فيه اساسا

    ربنا يرحم الشهداء
    ويشفى المصاببين على خير ان شاء الله

    ReplyDelete
  2. الاعلام دة لو كان قدامى كنت سلمته للشرطه العسكريه تحدف عليه شويه قنابل ويحرقوا لانه عميل سابق ومتمرن جيد علي يد مخربين البلد

    عندك حق في الكلاك بتاعك بجد منطقيه جميله عجبنى بوستك انتى ودينا :)

    ReplyDelete
  3. حلوة اخر جملة .. لوفاتتك الثورة دي الإعادة

    ربنا يصلح الحال يارب والله قلوبنا معاكم
    وان شاء الله مصر ح تقدر تعدي الازمة دي على خير
    تمنياتي للجميع بالسلامة

    ReplyDelete
  4. عندك حق يارضوى
    الناس بقت عماله تدعى ع الثوار ويقولوا موقفين حال البلد وبسببهم هتتلغى الانتخابات طيب ما لو فكروا بالعقل هيلاقوا ان الناس دى ملهاش ذنب حتى لو هما غلطانين لو فرضنا مثلاً ايه اللى يخلى الداخلية تموتهم وتضرب فيهم طالما اعتصامهم كان سلمى ليه بيدبحوا فى الناس اللى فى شارع محمد محمود
    ياريت الاعلام بدل ما يضلل الناس يفتح عنيهم ده كله لمصلحة بلدنا علشان بلدنا ترجع تقف على رجليها عاوزين كل واحد يخاف عليها ويعمل علشانها بجد مش مجرد كلام ...

    الواحد والله مش عارف يقول ايه استغفر الله العظيم يارب
    ربنا يحفظلنا بلدنا آمنه يارب وسالمة من كل سوء
    ويصبر اهالى الناس اللى ماتت

    تقبلى مرورى..

    روزى

    ReplyDelete
  5. عندك حق ..بس بالنسبه للانتخابات ..دلوقتى مفيش قوى سياسيه مقاطعه ..ومقاطعتك ليها مش عمليه دلوقتى ..طالما مفيش قوى سياسيه مقاطعه..يبقى ننتخب ونحرص ع وصول صوتنا للى يستحق..وقدامنا الاختيارت كتيره

    ReplyDelete