Tuesday, May 28, 2013

أنا -برفقتي أسد- نأكل الباستا



ولأن بقالي فترة مش بكتب، ولأن أخر تدوينة كانت من 3 شهور، ولآني قررت أن أفتح صفحة ورد وأطلع كل المشاعر اللي جوايا، مهما كانت كتيرة أو لأ، مترابطة أو لأ، ذات معنى أو لأ، أنت مش مضطرين تقراوا أو تردوا، أنا بطلع مشاعر و كلام محبوس .. مش أكتر.
....

حتى الأن ملقيتش المكان اللي بيعمل باستا الأحلام اللي بتخيلها و بشوفها في التلفزيون و بتكون الجبنة سايحة فيها و لو فيه صوص بيكون جزء لا يتجزأ منها، ملقيتوش المكان ده. كل مكان أروحه و أطلب باستا، وأقعد أسرح في الطعم والشكل و الجرسون اللي هيجي يقولي "الباستا يا آنسة" ويحط قدامي طبق الجنة الموعود، أفاجئ بطعم (أو شكل) غير ملائم للأحلام. لذلك قررت أني لو عايزة حاجة تتعمل صح أعملها أنا، قررت أعمل باستا الأحلام. جبت كل المكونات اللي أنا عايزاها، الطماطم كانت جميلة وقدرت أقاوم إغراء أكل الطماطم لوحدها وأنا بتفرج على مسرحية العيال كبرت، كما أفعل دائماً. المكرونة كانت جميلة، والمياه على عكس العادة مكنتش مقطوعة. كل الظروف كانت مهيأة لطهو الباستا .. ولكن إذ فجأة، وأنا بغلي المياه عشان أعمل المكرونة، وأنا قاعدة أسمع أغنية كورية اسمها "Cooking? Cooking!" لأن لازم أحط نفسي في الموود... النور قطع.

أيووة .. النور قطع. قررت أني مش هعمل الباستا، وقعدت في البلكونة، أسمع أطفال بيلعبوا في الشارع و صوت عربية وصوت شاب بيقول "النور قطع و أنا بجيب الطلبات والله" .. و أنا قاعدة أكل الطماطم الحمراء الجميلة.
...

أنا عمري ما كنت شخصية بتشتكي، أو شخصية زنانة، او شخصية تطلب مساعدة من حد. وتقريباً المجتمع مش معترف بيا كبنت بسبب الحاجات دي، لأن على ما يبدو لازم أكون مستضعفة "مهيضة الجناح" أرجع للـ "ذكر" في كل كبيرة وصغيرة عشان أكون بنت. أنا مشاكلي بفكر فيها بنفسي، مش مشاكلي؟ وأحزاني بخليها لنفسي، لو حكيتها لحد يبقى لازم تقولي حل على الأقل، ما هو أنت مش عايزني أحكي وكما مش هستفيد حاجة من الحكاية. فضفضة؟ النت بيقوم بالمهمة دي على أتم واجب.

أنا مش بحب أحكي مشاكلي لحد، لأن تاني يوم أما بنام وأصحى، بتكون إتحلت –والحمدلله- أحكيها ليه؟ ناس غريبة.
....

 أحلام اليقظة غير صحية، بالنسبة لي على الأقل. كل حلم يقظة بيوديني أماكن وحاجات مشوفتهاش غير في أفلامي ودراماتي، طيب وبعدين؟ أنا و عقلي عارفين أنها مستحيل تحصلي ولكن مش بقدر أمنع نفسي من أني أحلم بأن المصادفات والحظ يلعب معايا للدرجة اللي بيها يحصل ده كله. أحلام يقظتي ليست من نوع "هنجح بكرة في الامتحان" ولا "هخرج أشتري كذا كذا بكرة" ولا حتى "الصيف ده هنروح كذا كذا" .. أحلامي ... خيالية نوعاً ما. وده شئ غير صحي بالمرة.
....

أنا لما بنصح حد بفيلم بكون عايزة أقعد أشوفه معاه و أتفرج على تعبيرات وشه وأشوفه هينبهر زيي ولا لأ، هيفرح زيي و هيزعل زيي ولا لأ. لذلك سراً لما بنصح حد يشوف فيلم ما من أفلامي المفضلة بتفرج عليه تاني و بتخيل هذا الشخص اللي نصحته و هو ينبهر بالفيلم مثلي.
....

مش بعرف أسمع أغاني و أنا قاعدة، إلا إذا في موقف إضطراري زي وجودي في عربية مثلاُ، غير كده لازم بتمشى وأنا بسمع الأغاني. الأغاني والموسيقى بشكل عام بتديني طاقة لازم أفرغها بالحركة.
....


أنا بحب أيس كريم الشوكولاتة اللي بأكله دلوقتي ده، وكمان بحب هوا الفجرية اللي بقعد فيه كل يوم.

14 comments:

  1. أنا أول مره أدخل مدونتك وإن شاء الله ستستمر الزياره
    فيه جوانب كتير فى حياتك موجوده فى حياتى ويمكن ده الى محسسنى بالبوست أكتر إن الواقعيه بنعشها أكتر من الخيال

    ReplyDelete
    Replies
    1. نورت المدونة :)
      سعيدة أنها عجبتك ..

      Delete
  2. عارفة أنا بردو مش لاقية الباستا اللى فى أحلامى
    رغم إنى بعملها بنفسى بس لازم يبقى فى حاجة غلط
    يا الشكل حلو يا الطعم حلو
    الاتنين مع بعض دى نادراً

    معاكى جداً فى موضوع الفضفضة والمشاكل دى
    ولذلك بطلت احكى مشاكلى لحد
    حتى لأصحابى

    بالنسبة لباقى الكلام التانى
    فـ انتى دايماً لما بتتكلمى بلاقيكى زى ما انا متخيلاكى بالظبط :)

    ReplyDelete
    Replies
    1. شكلها أزمة منتشرة حكاية الباستا دي يا دينا :)

      ربنا يخليكِ يا جميلة ^_^

      Delete
  3. انا لازم افضفض مع حد
    مبقيتش اعرف اخلى مشاكلى لنفسى والا هاموت
    :)وعلى فكرة .. كلامك بيخلينى جعانة

    ReplyDelete
  4. بس سؤال
    ايه سر الاسم الغريب ده ؟
    برفقتى أسد ؟؟

    ReplyDelete
    Replies
    1. الاسم ملوش أي دلالة غير أني استوحيته من الصورة اللي حطيتها يا هوبة :)
      انا كمان لما بكتب بجوع نفسي اكتر _^
      نورتي المدونة يا جميلة ^_^

      Delete
  5. السبب وراء موضوع انك مش هتلاقي المكونات اللي بتحبيها هو - بخبرتي التجارية- اقتصادي بحت لان غالبا المكون الزيادة بيكلف و المستهلك عايز حاجة ارخص و هيو بيعتمد على الجهل العام من الناس بالمكون الاصلي للباستا
    و الجزء التاني بيبقى فهلوة :)

    جاوبت على الجزء ده عشان بأعاني منه زيك تمام..

    أنا بحب أيس كريم الشوكولاتة اللي بأكله دلوقتي ده، وكمان بحب هوا الفجرية اللي بقعد فيه كل يوم.


    أنا بحب أيس كريم الشوكولاتة اللي بأكله دلوقتي ده، وكمان بحب هوا المغربية اللي بقعد فيه كل يوم.
    ده انا بقى :)

    افتر اول وي ار فروم تو ديفرنت ورلدز بت وي ار برتي ماتش ذا سيم

    تحياتي و عود احمد للتدوين كانت واحشانا تدويناتك والله

    ReplyDelete
    Replies
    1. عايزة باستا حقيقية بقى! :D
      يس وي أر انديد :)
      ربنا يخليك هحاول مغيبش بالشكل ده بعد كده

      Delete
  6. السلام عليكم

    اول مرة امر من هنا
    عجبتنى الحجات الكتير اللى اتكلمتى فيها ومعظم خواطرنا بنشترك فيها لان حياتنا بتحمل نفس المعانى


    بس جوعتينى على فكرة وانا بقول يارب الرجيم يكمل :)


    دمت بخير

    ReplyDelete
    Replies
    1. وعليكم السلام ورحمة الله وبركاته يا رؤى :)
      نورتي المدونة وأتمنى متكونش أخر مرة تنوريها ..

      هههههههههه إن شاء الله يكمل متقلقيش :)

      Delete
  7. :)) وأنا مبسوطة إني دخلت هنا

    ReplyDelete
  8. يااااااااااه يا عبد الصمد :D

    عودًا أحمد يا رضوى :)

    وكالعادة تدوينة شخصية جدًا تحولت لتجربة عامة :)

    أنا كمان بحلم أحلام يقظة كتيرة بس عادي .. هنرجع تاني لأرض الواقع وهننسى..أو نتناسى :)

    استمري

    تحياتي :)

    ReplyDelete