ليه احنا دايما شايفين ان برة مصر أحسن ؟؟
ليه دايما لما نحب نفكر فى مستقبل مضمون أو حياة أحلى دايما نفكر و نقول " لازم نروح برة مصر"
ليه مش شايفين مصر حلوة .. أو الحياة فيها ليه مش مالية عيننا
ليه عمرنا ما حلمنا نكمل حياتنا "جوة مصر" ؟؟
أنا هقولكم ليه .. لانى عشت حاجات كتيرة و بسيطة خلتنى أعرف ليه احنا عايزين نروح برة مصر
برة مصر .. فيه نظام فى أبسط الحاجات , نظام فى المرور , نظام فى الوقت و الشغل , نظام فى معاملات الناس , ده حتى فى نظام و انت بتشترى حاجة
بذمتكم , الصين مثلا اللى سكانها ضعفنا ستين مرة .. عمركم سمعتم عن أزمة مرور عندهم زى ما عندنا
ليه ؟؟ عشان احنا مش عندنا و لا نظام و لا احترام لغيرنا .. و كل واحد يقولك هو انا اللى هغير البلد ؟؟
برة مصر .. صعب أوى أنك تموت و انت مستنى دورك فى المستشفى .. هتقولوا ازاى ؟؟
بقى يرضى مين ان واحدة تكون عندها أزمة قلبية و تروح مستشفى و محدش يهتم بيها و تفضل نصف ساعة تصارع الموت و تموت و هى جوة المستشفى و لا حد واخد باله منها
يرضى مين أنك تكون حالتك خطر و بتموت و رايح مستشفى محترمة –المفروض- بس حتى ميرضوش ياخدوك على نقالة غير لما تدفع الاول
يرضى مين أن يكون العلاج و الادوية لاكتر امراض منتشرة اغلى حاجة .. و الناس المسكينة تعمل ايه ؟؟ تموت من التعب !!
برة مصر ... موهبتك ممكن تستفيد منها فعلا و تشتغل بيها !!
انت لو فى مصر و عندك موهبة صدقنى على ما توصل مرحلة الجامعة , هتكون الموهبة دى ماتت , من أساليب التعليم العقيمة , و عدم الاعتراف بحاجة اسمها موهبة فى الشخص .. كل اللى هيعلمهولك انك ازاى تحفظ و تروح ترمى الكلام فى الامتحان و هكذا طول سنين حياتك !! قولى انت ازاى هتشتغل لو فضلت تعمل كده ؟؟
انت لو موهوب بتعرف تكتب او ان شاء الله بتعزف حاجة .. برة انت ممكن تبقى حاجة فعلا !!
مش هقول دايما بس على الاقل منطق الموهبة و استخدامها ده موجود برة فعلا و هقولكم أبسط و أشهر مثال:
دكتور أحمد زويل , كان فى مصر و مكنش حد يعرف عنه أو عن اكتشافاته حاجة , راح أمريكا وحسوا بموهبته هناك و استخدموها و خلوه يوصل لنوبل !! .. أعتقد الفكرة وصلت
برة مصر ... مش هتترمى سنين فى بيتك من غير شغل بس عشان مش عارفة تجيب واسطة
رغم ان الوسايط فى مصر دلوقتى مبقتش فى الشغل بس .. لكن أكبر مثال هو الشغل ,, انت لو متعرفش حد ان شاء الله كنت بتعرف تطلع نار من عينيك و لا هتعرف تشتغل فى البلد دى .. فى حين أن ممكن حد مش بيعرف يعمل نص اللى بتعمله لكن اشتغل و فى مكان عمرك ما حلمت بيه و لكن ليه ؟؟ عشان الواسطة
و طبقوا نظام الواسطة ده فى كل حاجة ابتداء من الدليفرى وصولا لركوب التاكسى !!
برة مصر فى حاجات كتيرة أوووى و للاسف مش موجودة فى مصر .. بس احنا عمرنا ما فكرنا نسأل هو ده ليه مش موجود فى مصر ؟؟
ليه احنا كده ؟؟ ليه كل واحد حلمه يخلص جامعة و يسيب البلد ؟؟
و لو معرفش يحس ان مستقبله ضاع ؟؟
ليه مصر مبقتش زى زمان ؟؟ ليه معادتش مصر الى كان لو واحد مسافر و يرجع على طول خايف يموت برة بلده ؟؟
أنا زعلانة على مصر و زعلانة أكتر لانى أنا كمان عايزة أروح برة مصر !!
مع ان كل الى انتى قولتية صح وان الى ملوش ضهر هضرب على افا بس لو حطيطى الغلط على القانون والحكومة هنديها مثلا 50% بس واحنا 50% برضه التغيير من الناس مش من الحكومه كل واحد فينا لو حط فى دماغة الاخلاق والا حترام والدين طبعا يبقى اكييد البلد دى هتتغير لو عايزيين التغير ونرجع البلد دى زى زمان نبص فى المرايا ونغير من نفسنا الاول احييكى على روح الصراحة ولاسف انا كمان كنت ومازلت مستعد للسفر فى اى وقت بس مقدرش علشان حاجات كتيير بس فعلا البلد كويسة وربنا يسترها معانا الايام الى جايا
ReplyDeleteأنا عارفة ان طبعا الغلط مش فى الحكومة لوحدها
ReplyDeleteالغلط الاكبر فى الشعب لانه هو نفسه مش عنده استعداد أنه يتغير للاحسن للاسف
كل واحد يقولك ماهو غيرى بيعمل كده .. يعنى هى جات عليا
و بالمنطق ده و طريقة التفكير دى مش هنتقدم و هنفضل مكاننا و حوالينا مله بيتقدم !!
ربنا يسترها و يرجعلنا مصر بتاعت زمان يارب !!
طبعا كلامك مضبوط يا رضوى وخصوصا ان كل واحد فى البلد دى بيقول هو انا اللى هاغير البلد دى بس بصراحه انا بقول لكل واحد بيقول كده ابدا بنفسك اولا ولو كل واحد ابتدا بنفسه واتقى ربنا فى شغله والتزم فى المرور ووسائل المواصلات وبطل يرمى زباله فى الشارع وغيرها كتير البلد دى هاتبقى احسن بلد بس المشكله ان كل واحد فينا مستنى غيره يعمل الخطوه الاولى
ReplyDeleteبالضبط كده .. كل واحد مستنى غيره هو اللى يبدأ
ReplyDeleteو مش بيفكر أنه ليه ميكونش هو أول واحد يبدأ يغير من نفسه
زبالتالى اللى حواليه هيتغيروا و هنبدأ كلنا نتغير ..
بس نعمل ايه دى طريقة تفكير بقت راسخة عندنا ان اشمعنى انا ؟؟
احنا طول عمرنا أحسن بلد فى الدنيا .. بس احنا اللى نسينا و معدناش بندى نفسنا فرصة نرجع أحسن بلد
امبارح مصادفة سمعت اغنية لواحد اسمه محمد عباس اسمها "هاسيبك لمين" وبجد كنت بعيط وانا بتفرج عليها
ReplyDeleteمبدأ انك تسيب بلدك عشان تلاقى نفسك ومستقبلك حاجة ولا عيب ولاحرام .. بس بتوجع والله
الفلسطينيين بيدوروا على شوية رمل من بلدهم حتى يشموا فيه رائحة الوطن
حاجة توجع القلب .. ربنا يصلح حالهاا بقى عشان بجد بحبها ..