Sunday, March 20, 2011

الحرية اللى صباعها بمبى

حريتى و صباعى البمبى !!

يوم استفتاء الدستور !!

كان أول يوم أحس بمشاركتى السياسية .. لآنه أول يوم طبعا يكون ليا مشاركة سياسية فعلية

ليه مشاركتش قبل كده ؟؟

كنت دايما أقول لنفسى حاجة واحدة .. مشاركتى هتعمل ايه ؟؟

لا إما هيزوروها .. أو مش هتوصل أصلا

على طول بنشوف الرئيس بيكسب  و أى مرشحين من أى حتة تانية تبعه بيكسبو برضة

حتى لو محدش راح و انتخبه .. بس أهو كسب

أكيد دى بركة دعاء الوالدين و الله !!! ..أن واحد يكسب من غير ما حد يختاره

المهم يومها .. حسيت أن بطاقتى ليها فايدة غير أنى أخبيها فى المحفظة

أن صوتى أقدر أقوله فى مكان رسمى بدل ما أقعد أكتبه على الفيس بوك

أنى أقدر أشارك و أكون مصرية بجد .. و اتاكد أن صوتى هيعمل فرق بجد !!

شفت الناس المتفائلة و المتشائمة .. الناس اللى اتأثرت بالثورة و الناس اللى بتلعن الثورة

بس كله عايز يشارك .. كله عايز يبنى مصر ..

 و يقول أنا استفتتيت..أنا صباعى بقى بمبى .. أنا قلت رأيى و مخفتش من حد و محدش أجبرنى على حاجة

حتى النتيجة اللى هتطلع مش هتهمنى قد ما هامنى أن كلنا شاركنا

كلنا نجحنا فى امتحان الديمقراطية و بجدارة ..

عشان بس الللى كانوا بيقولوا الشعب المصرى مش مهيئ للديمقراطية..

احنا مصريين .. علمنا العالم الحرية و الديمقراطية و حاجات تانية كتيرة و هنفضل نعلمهم !!

هحترم النتيجة اللى هتطلع .. لان ربنا مش هيضيع دم الشهداء .. مش هيضيع تعبنا فى الثورة

احنا مشينا الريس .. و ان شاء الله هنجيب كرسى تيفال !!

أى حاجة بعد كده ان شاء الله هنقدر نعملها ..

تحيى الحرية اللى صباعها بمبى :)


1 comment:

  1. :)
    رغم اعتراضي على الاستفتاء و اني شايفاه غلطة
    بس كويس اننا حسينا بطعم الديمقراطية أخيرًا
    و البطاقة اللي شكلها وحش بقه ليها فايدة
    :D

    ReplyDelete