لاحظت الأن مدى الشبه بين البشر و الزهور ..
فى البداية قبل أن تتعرف عليهم فعلا ..
هم عبارة عن زهور متألقة لامعة .. قد لا تحتوى عبقا و لكن بالتأكيد شكلها الخارجى
يطغى على ذاك العبق ..
و لكن ماذا يحدث عندما تختفى نضرة الزهور ؟ تبقى رائحتها !
هكذا هم البشر , قد تختفى النضرة التى تصاحب اللقاء الأول و لكن تبقى تلك الرائحة الجذابة التى تجعلك تتمسك بهم أكثر .. !
و لكن منهم من تختفى النضرة عنه و تجد أنه لا يحمل عبقا وراء كل ذلك التألق , فلا يكون بالنسبة لك سوى زهرة جافة .. !
عمرك حسيت أنك معدتش عارف إيه هدفك ؟
أو أنك عايز تبقى إيه فى الحياة الطويلة العريضة دى !
أنا فى مرحلة الابتدائى .. كان نفسى أطلع دكتورة أطفال أو ممثلة معرفش ايه العلاقة ؟ :)
فى مرحلة الاعدادى .. بقيت عايزة أطلع مضيفة طيران !
فى الثانوى .. قلت لأ عايزة أبقى صحفية !
و أنا أهو فى أخر سنة من الجامعة .. و مش عارفة أنا عايزة أبقى إيه !
كل اللى أعرفه أنى عايزة أعمل حاجة بحبها .. و أنا بحب أكتب !
بس مش عارفة هأكتب إيه ؟ هأشتغل فين ؟ هأطلع إيه ؟
بيقولوا أنك مادام مش عارف إنت رايح على فين .. يبقى أنت ماشى على الطريق الصح !
بس أنا ليه مش حاسة أن ده الطريق الصح و لا حاجة ؟
سئلت كثيرا عن الحب .. و لكن يوما لم أستخدم الاجابة التى دوما ما تجول بخاطرى
الحب بالنسبة لى صوتك ..الضحكات التى تخفيها .
و الجدية التى تصطنعها .. أتعلم ؟
أعتقد أنى أحببتك من صوتك !
...
سألتنى , إن كنت أحببتك منذ أن قابلتك ؟
و لكنى أطرح على نفسى سؤال أخر ..
هل أحببتك منذ أن قابلتك ؟
أم قابلتك من فرط ما أحببتك ؟
...
آيس كريم فراولا بالفانيليا فى الصيف .. شوكولاتة ساخنة تحت البطانية فى الشتا
صوت فيروز و شوية هوا فى الفجر ..
عارف ؟ حبك أحلى من ده كله !
...
بمجرد أن عرفتك ..
أصبح لأغانى الحب القديمة و كلمات العشاق السابقين و روايات الحب المتناثرة ..
أصبح لهم جميعا معنى فجأة !
حصل موقف إمبارح و لسة لحد دلوقتى بفكر فيه و شايلة همه !
كنت قاعدة فى أوضتى فى أمان الله و فجأة لقيت صوت عالى من تحت فى الشارع , اتخضيت .. فجريت أبص من البلكونة أشوف فى إيه . لقيت واحدة ست بتزعق و بتصرخ فى الشارع , شكلها لا يدل أنها مش عاقلة و كذلك لا يدل على الغنى أو الفقر , إعتقدت فى البداية أنها خناقة مع حد فى الشارع , لكن ملقيتش حد بيتجاوب معاها , أو حد بيرد عليها أو حد حتى بيحاول يحوش .. استغربت ! اكتشفت أنها مش لوحدها معاها 2 ستات و عربة سوزوكى عادية بداخلها على ما يبدو أطفال ..
لا شئ غريب حتى الأن صح ؟ كنت على وشك الدخول و لكنى وجدتها تصرخ مرة أخرى و هذه المرة صراخها مصحوب بشتائم , قلت أكيد فى حاجة كبيرة , و طلع ظنى صحيح , فوسط صراخها , سمعتها بتقول "إبنى" .. بدأت أفهم ما يحدث !
على ما يبدو هم عائلة قدموا مع أولادهم لشراء بعض الأشياء , و على ما يبدو تركو الأطفال فى تلك العربة التى رأيتها , و عندما عادت لم تجد إبنها وسطهم ! طبعا كل ده فهمتو و أنا فوق !! لقيت نفسى بلبس و واخدة أخويا معايا و نازلة لتحت ! إستغربت أن مفيش حد وقف يساعدها .. الناس بالكتير كانوا بيسألوها مالك ! بس ما علينا نزلنالها و طلع كلامى صح ! أقنعتها تكلم ناس قرايبها أو كده يجو يساعدوها و تبلغ بسرعة عن اختفاء ابنها ..
كلامها اللى قالته لما قلتلها كده وجعنى أوى .. "أبلغ ؟ و هيعملولى إيه .. يا هيضربونى و يشتمونى و لو لقوا ابنى و النعمة ما هيرجعوه .. بلا شرطة بلا وكسة توكسهم" .. قلت أحاول أساعدها شوية ..خدت وصف ابنها و مشيت أسأل الناس اللى فى المحلات فى الشارع و خدت الشارع كله و أخويا خد الشارع اللى جنبه .. بلا أمل !
على ما رجعت لقيت الست صعبت عليا , قعدت على الرصيف و بدأت تعيط ! و الستات اللى معاها قاعدين جنبها و مش عارفين يعملوا ايه و الأطفال فى العربية منهم اللى مستغرب و صغير , و منهم اللى كبير و فهم اللى حصل و بيعيط !
إضطريت أطلع , و فضلت متابعة من فوق , بعد شوية 5 رجالة وصلوا و فضلوا يدوروا , الموضوع استمر للساعة 1 بليل تقريبا , و الست بتفقد أعصابها و أنا بفقدها معاها و عمالة أدعى تلاقيه .. إضطريت أدخل لنص ساعة , لما رجعت ملقيتش أى أثر ليهم .. و لسة بدعى لحد دلوقتى أنها تكون لقت إبنها !
أرجوكم .. لو خارجين و معاكم أطفال , أرجوكم خدو بالكم منهم !
لو خارجين فى زحمة و هتشتروا حاجات بلاش تاخدوهم , و لو خدتوهم , أرجوكم خليكم مسئوولين و متسيبهومش يغيبوا عن عنيكم !
أرجوكم خدو بالكم من أطفالكم ! لأن بجد مفيش حاجة توجع القلب قد اللى شفته امبارح ده !
التدوينة دى كوليكشن من كام حاجة كده .. نبدأ بالآقدم ..
رسمت رسمة جديدة فى مشروع "رسمة كل يوم" و هى أرسم : أفضل صديق لدى !
و ملقيتش حد أحسن من سبونج بوب يقوم بالمهمة دى .. كان معايا فى الحلوة و الوحشة!
و استحملنى و أنا بحكيله كل مشاكلى .. و سمعنى كويس أووى و عمره ما قالى حاجة وحشة
...
بعد كده عن إسرائيل و الندالة , و البطل الطائر أتحدث !
أول حاجة لازم أقولكم و أفهمهكم كويس أن مصر أقوى من إسرائيل ميت مرة ! لا تظنوا و لا للحظة أنهم أقوى أو أحسن مننا .. و اللى عملوه ده جبن و خوف ..قتلوا 4 جنود مصريين على الحدود فى سيناء ! و مفيش أى رد فعل حقيقى و قوى من حكومتنا و لولا حركة أحمد الشحات كان زمانى لسة دمى محروق !!
جنود الجيش دوول على راس كل واحد مصرى ! هم اللى حامينا و من حقهم علينا , جنازة عسكرية محترمة ليهم , و الحكومة تتخذ قرار محترم غير "سحب السفير المصرى اللى طلع مسودة" .. دلوقتى أتكلم عن أحمد الشحات ! أنا مصدقتش الخبر غير أما شفته بنفسى ! بجد الراجل ده ما شاء الله عليه فرحت بيه جدا أنه يطلع 24 دور ينزل العلم الاسرائيلى و يرفع المصرى !! دى بطولة .. و أنا متأكدة أن إسرائيل مرعوبة من الحركة دى .. عارفين ليه؟ أكيد هم دلوقتى عارفين إن إحنا عندنا إستعداد نموت لو ده هينزل علمهم بس .. أمال لو هم بقى هنعمل فيهم إيه .. و دى رسمة لاتوف عنه , أعجبتنى جدا !
...
و أخيرا عن ليبيا و القذافى و الحرية أتحدث !
مبروك لليبيا و لثوار ليبيا .. أخيرا رغم أنهم فقدوا أرواح كثيرة الا أنهم تخلصوا من المجنون القذافى , بعد أن سلمت كتائبه نفسها و إعتقال أولاده سيف الاسلام و الساعدى , كانت النهاية و التى أدت لاعتقال القذافى نفسه و أتمنى له الاعدام جزاء لآرواح الليبين التى أزهقت و غباؤه الذى أدى للتدخل الأجنبى فى بلده .. أدعو لليبيا أن تخرج من هذا المأزق و أن تتخلص من حلف الناتو بالمرة كمان ! "خدو بالكو من أى توك توك فى البلد .. محدش عارف يمكن القذافى يهرب و يجى على هنا يشتغل سواق تكاتك"!!
...
عقبال سوريــا .. و دورك يا بشار المجرم جاى إن شاء الله !
قريت النهاردة عن موضوع حلو اووى و عجبنى بجد !!
فى باحثة للأسف مش فاكرة اسمها و مش عارفة أجيبه .. بس هدور عليه تانى !!
المهم الباحثة دى كانت بتعمل رسالة دكتوراة .. هى أمريكية بالمناسبة !
دراسة الدكتورة بتاعتها كانت باسم "Reveal and Conceal" يعنى (إظهــار و إخفــاء)
طيب موضوع الدراسة دى إيه ؟
طريقة نشر "الغسيل" عند المصريين !
أه و الله .. اولا معروف إن إحنا فى البلكونة .. عندنا حبال اللى بننشر عليها صح ؟؟
اللى مش منتشرة أو مش موجودة برة أصلا .. و عادة بيكون عندهم حاجة كده بيحطوا عليها الغسيل بتاعهم "مش عارفة اسمها ايه" .. أو سقف العمارة و كلهم بيشتركوا فيه .. أو بيجففوا الملابس و هى بتتغسل بس ما علينا يعنى .. المهم نشر الغسيل كان بالنسبة ليها ظاهرة و خدته موضوع !!
و فضلت سنتين بتلف القاهرة , و صورت حوالى 10 آلاف صورة للغسيل المنشور , و صنفتهم و قابلت عينات من كل تصنيف و طلعت بنتائج رهيبة !! و مدى تشابه طريقتهم فى نشر الغسيل بشخصيتهم .. فمثلا لقت ان السيدة "المحافظة" بتنشر ملابس زوجها و ملابس الرجالى قدام قبل ملابسها .. و السيدة "الأم أو عندها أطفال كتيرة أو الأطفال واخدين حياتها" بتنشر ملابس الأطفال و حاجاتهم قدام .. و السيدة "اللى مش أووى كده يعنى" بتنشر قمصان النوم و هكذا قدام .. إلخ إلخ إلخ !
و طلعت بتحليلات لشخصياتهم و لشخصية المصريين بشكل عام !
الفكرة إيه: إنك فى العلم أو فى أى حاجة تانية .. لو بدأت صغير لازم تبدأ تكبر و تكبر , خد فكرة صغيرة و حولها لاكتشاف عظيم !
موضوع عجبنى بجد و حبيت أشارككم بيه =)
أعانى من نفاذ الأفكار فعلا , أشعر كما لو أن كان هناك دلو من الأفكار ينساب داخل عقلى
و فجأة جف أو اختفى ..
و بينما أنا هكذا فى حالة البحث عن أى شئ يصلح للكتابة , كنت أستمع منذ قليل لأغنية لفيروز , ربما لأنها مرتبطة بحالة "أنا عايزة إلهااااام" أو ربما لأنى أعانى من صداع و كان عندى أمل أخير بأن صوتها سيجعل الألم يختفى ..
و لكن الصداع لم يذهب و مازلت حائرة بلا فكرة !
إمممم , إضافة إلى الصداع , أشعر بحالة من الاكتئاب الذى لا اجد له تفسيرا , ربما بسبب الروتين الذى قد يكون مريحا , و لكنه لا يأتينى بجديد فبدأت أشعر كما لو أن اليوم يتكرر و يتكرر و يتكرر ويتكرر !
الأن لنحصى ماذا لدينا .. صداع ,انعدام أفكار , اكتئاب , و روتين !
العيد إقترب , لما لا أشعر بنفس الفرحة ؟ ألا يكفى ما سبق ؟
أحاول أن أفكر , لا بد من أننى أذيت أو جرحت شخصا ما , ربما أغضبت أحدهم , لا بد أن هذا هو السبب و إلا لما كل هذا ؟
حتى رمضان يمضى أسرع مما توقعت , فها قد مضى أثر من نصفه !
إكتشفت الأن أنى أثرثر بلا جدوى ..
و بما أنى لن أستطيع النوم الأن .. نعم أضيفوا للائحة الأعراض السابقة: الأرق
فربما أعيد جولتى الروتينية المعتادة فى تصفح النت ..
ربما الشئ الوحيد الذى فعلته اليوم هو الرسمة الثالثة فى مشروع رسمة كل يوم ..
و هى أرسم أقرب صديقة لى : حاولت رسمها و لكن الموود حكم على أن تطلع الرسمة مش و لا بد !
إلى المجلس العسكرى :
دى مجرد رسالة صغيرة من مواطنة مصرية . و لا هتشتم و لا هتسب و لا "هتهين المجلس العسكرى" .. مجرد بتسأل بس !
أكيد حضراتكم فاكرين الثورة ! .. مين قام بيها ؟ كانت ضد مين ؟ و كانت عشان ايه ؟
اللى قام بيها ؟ الثوار و النشطاء اللى بيتسجنوا و بيتحاكموا !
كانت ضد مين ؟ مبارك و أولاده و أعوانه اللى مفيش ذرة عدل فى محاكماتهم أو القرارات الصادرة ضدهم !
كانت عشان إيه ؟ عشان نلغى نظام مبارك و نعيش فى بلد نضيفة .. رغم ان ده متحققش الصراحة !!
الشهداء ! .. فاكرينهم حضراتكم طبعا !! .. أيوون اللى أنتوا أديتلهم التحية !!
فين حقوقهم اللى مرجعتش ؟ اللى قتلوهم بياخدوا براءة واحد ورا التانى و لسة بيتعاملوا كما لو أنهم ملوك .. أهاليهم بيتبهدلوا لمجرد أنهم عايزين حق ولادهم !! أكتر من 800 شهيد .. فين حقهم ؟
طيب المصابين ؟ اللى مش عارفين يتعالجوا دول .. هم مطلبوش يتعالجوا زى مبارك , كل اللى طلبوه أنهم يتعالجوا .. و بس !!
الناشطين و الثوار .. و البهدلة اللى بيتعرضوا ليها يوميا , من تعقب و ذل و بهدلة و ضرب و محاكمات عسكرية .. ليه ؟ من أهداف الثورة (اللى مفروض أنها اتحققت) حرية الرأى و التعبير .. و لما دول ينتقدوا حضراتكم , معتقدش أن ده يدعو أنكم تعملوا فيهم كده .. و لما ينتقدوا حكمكم .. أعتقد أن حضراتكم مش هدفكم الحكم كما سبق و ذكرتكم .. مش كده ؟
طيب ليه متهمى موقعة الجمل و قتل الشهداء و سرقة أموال الدولة و نشر أعمال البلطجة .. مش بيتحاكموا بنفس القسوة و الشدة دى ؟
مثال على البلطجة (أبناء مبارك) اللى ليهم فيديوهات حية و هم بيضربوا ثوار و أهالى شهداء و ناشرين بيانات و كلام فيه لهجة أشد ميت مرة من أى حد من النشطاء استخدمها , ليه مقربتوش منهم ؟
ليه مازلتم ماشيين على أسس مبارك ؟ أرجوكم بلاش تحسسونى أن الثورة كانت هباء !! أرجوكم بلاش تخلونى أندم أنى وثقت فيكم يوم ما قلتم أنكم بتساندو الثوار و الثورة و هدفكم لم و لن يكون الحكم , أرجوكم بلاش تحسسونى أن مفيش أى فرق !!
ليه بتكرهو الشارع المصرى فى الثورة و هى أملهم الوحيد ؟
ليه مشفناش أى تطور جديد فى الفترة اللى أنتو ماسكين فيها , بينما أنكم قلتم أن هيحصل تحقيق للمطالب , بينما كل اللى شايفاه مبارك نايم على سرير جوا قفص من غير ما تكون فيه محاكمة فعلية , و ناخد بالنا أنه عسكرى و بيتحاكم محاكمة مدنية , و النشطاء المدنيين بيتحاكموا محاكمة عسكرية .. و هو موضوع يلخبط الصراحة !!
ليه الداخلية هيا هيا .. ليه الاعلام هو هو ؟
ليه و ليه و ليه .. أسئلة كتيرة جدا !!
فاتت 6 شهور و لم يحدث أى تطور !
إلى متى يجب أن ننتظر .. هل يجب أن ننتظر حتى تْقتل الثورة تماما ؟
يعنى إيه يا ثورة ؟
الثورة بمعناها الحرفى السياسى هي الخروج عن الوضع الراهن سواء إلى وضع أفضل أو اسوأ من الوضع القائم , و أول ثورة بذلك المعنى هى الثورة الفرنسية و التى عرفت الثورة على أنها قيام الشعب بقيادة نخب وطلائع من مثقفيه لتغيير نظام الحكم بالقوة , و تم تطوير هذا التعريف ليصبح هو التغيير الذي يحدثه الشعب من خلال أدواته "كالقوات المسلحة" أو من خلال شخصيات تاريخية لتحقيق طموحاته لتغيير نظام الحكم العاجز عن تلبية هذه الطموحات ولتنفيذ برنامج من المنجزات الثورية غير الاعتيادية.والمفهوم الدارج أو الشعبي للثورة هو الانتفاض ضد الحكم الظالم , و قد تكون الثورة شعبية أو عسكرية (إنقلاب) .
...
بس إحنا مالنا بالكلام ده كله .. ده كلام كبير و على الورق , بس الثورة أكبر من كده بكتير.
ثورة يعنى عدالة فى كل حاجة .. يعنى تاخد حقك من غير ما تضطر تدفع رشوة و لا "هدية للولاد" و لا تفضل تدور على واسطة و فى النهاية بتدفع برضة !
ثورة يعنى متحاولش تغير نظام غير لما تكون مقتنع أنك أنت لازم تغير كل اللى فيك وحش , و تقنع اللى حواليك .. ما أنت مش هتحس بحلاوة التغيير غير لما أنت تتغير.
ثورة يعنى تبقى مصرى أصيل , و بلدك تبقى فى عينيك !
ثورة يعنى تفكر قبل ما تتكلم , تتأكد قبل ما تنشر , و يكون ليك رأيك و سياستك , و دى مفيهاش مجاملة .
ثورة يعنى متسكتش على الظلم , لو شفته تنطق و تثور! أنت مترضاش لابنك و لا أخوك يتظلم .. ليه ترضاها لابن بلدك ؟
ثورة يعنى حياة أفضل .. خير أكتر .. تعليم أحسن .. إعلام نضيف .. حكام شرفاء .. يعنى مستوى أحسن لكل مصرى.
ثورة يعنى كل حاجة حلوة , ثورة على الأخلاق قبل ما تكون على نظام , ثورة على تفكير عقيم عشان تبنى أجيال بتفكر ..
الثورة عمرها ما كانت نتيجتها وحشة , و الثورة مش بتخلص فى يوم و ليلة و نصحى تانى يوم تبقى الحياة الجميلة , الثورة ممكن تستمر سنين , ممكن شهور .. المهم إحنا بعدها ايه ؟ لو فضلنا زى ما احنا .. استفدنا ايه ؟ اتحسننا ازاى .. اتقدمنا إزاى ؟
الثورة مش أنك تشيل الطاغية .. الثورة أنك متخلقش الطاغية !
*إهداء لكل ثـائر .. إهداء لكل مصاب .. إهداء لكل مواطن عادى مظلوم و بيتحاسب فى محاكمة عسكرية .. إهداء للشهداء .. إهداء لأى حد مصرى بجد**
النهاردة يوم جديد , و كنت ناوية أكتب عن حاجة تانية خالص تضامنا مع أسماء محفوظ بس أجلتها لحد ما أهدأ كده , و لقيتنى حضرت أمسية ثقافية حلوة فقررت أتكلم عنها =)
فى الأول .. ده تانى يوم فى مشروع الرسمات .. و تانى رسمة : أرسم حاجة مهمة ليا
أنا عندى حاجات مهمة كتيرة طبعا , بس أول حاجة جات عينى عليها دبدوبى ده اللى بحبه , فقررت أرسمه , هو أه مشلول شوية بس يمشى حاله .. عدوها يعنى :D
يا ترى حد تانى بدأ المشروع ده ؟ .. سارة صاحبة مدونة (قلم سارة) بدأته و رسوماتها عسل برضة , يا ترى حد تانى هيتسلى و يرسم معانا ؟
...
بالنسبة لموضوع الأمسية , هى كانت فى إطار الأمسيات الثقافية التابعة لقصر الثقافة المقامة فى حديقة السيدة زينب .. و تصادف ان اليوم كانت هناك أمسية للدكتور. محمد حافظ دياب و هو جدى بالمناسبة .. فاصطحبنى معه , و الصراحة مندمتش أنى رحت , الأمسية أكثر من رائعة و كان معاه الأستاذ الدكتور محمود عزب , و هو أزهرى قديم و هو مستشار شيخ الأزهر للحوار وأستاذ الحضارة الاسلامية بجامعة السوربون بباريس , و كان موضوع الأمسية (الحركات السياسية و الإسلام) .. و هجمعلكم أهم النقاط التى تناولوها :
** بدأت الحركات الإسلامية منذ وفاة الرسول و بدأ يظهر تدريجيا ما يسمى بـ (تديين السياسة).
** ظهرت عدة محالاوت للربط بين الدين و السياسة , منها فى الدولة الأموية عن طريق ما سمى بـ الجبرية. و الحركات الوهابية فيما بعد التى حاولت أن تجمع بين الصيغتين السياسية و الدينية و هى التى قامت على أساسها السعودية الأن .. و تلك الحركات إستمرت على مر التاريخ الإسلامى.
** الحركة الاسلامية: الفاعليات التى تقدمها جماعات فى التاريخ الاسلامى و التى تحاول أن تتخذ من القرآن و السنة مرجعا لشرعيتها.
و قد تعددت أنواع الحركات الاسلامية و انقسمت الى أربع تيارات أساسية وهى: الرسمى , السياسى , الشعبى و السلفى .
** نبدأ بالتيار الرسمى : و هو ما يقصد به الدين فى إطار تحديد الدولة الاسلامية و تقنين اللغة و مثال عليهم ( الأزهر الشريف) و هو منذ القدم مصدر الشرعية الأول و الثقافة الحقيقية , و هم لا يعملون بالسياسة.
دور الأزهر بالتأكيد محورى , فمن أهم ما قام به:
1 - طرد الفرنسيين (فيلق الأزهر)
2 - تعيين محمد على وفقا لشروطهم
3 - عزل الخديو توفيق
4 - كانت و مازالت منبر للمصريين ( خاصة فى ثورة 1919)
5 - أصدرت منذ أيام معدودة وثيقة الأزهر , التى قام على صياغتها مختلف التيارات
6 - رفضوا تحويل الأزهر إلى حزب , باعتباره مدرسة دائمة
** التيار السياسى: الجماعات التى تحاول أن تصوغ برنامجا لمشاريعها على أساس أن يكون القرآن و السنة اطارا لمرجعيتهم. و مازالوا يحاولون تقديم مشروع بديلا للدولة القائمة و مثال عليهم (الإخوان المسلمين) و قد وضح تأثرهم بالاخوان فى السعودية خاصة فى بداية تشكيلهم. و قد كونوا حزب: الحرية و العدالة.
** التيار الشعبى: هو شكل من أشكال التدين اتخذته الجماعات الشعبية و أضافت الى المعتقد الدينى بعض الاعتقادات الشعبية , و مثال عليهم (الصوفيين) و جماعات أخرى مثل (الاعتقادية, المهدوية ...إلخ). و أحيانا كانوا يتخذون منهجا ثوريا.
و مصر بها الأن تقريبا 120 طريق صوفى و تقريبا 3000 مولد سنويا, و مصر أيضا هى البلد الوحيد الذى قنن الجماعات الصوفية (أى وضع لها قوانين و شرعها)
**أخيرا, التيار السلفى: و هم السلفيون و هم من يتخذون من القرآن و الحديث ملجأ لهم لا غير و فيه تضييق للفكر , و هم حتى يختلفون فى تحديد من هم السلف. هم يؤمنون بالاتباع لا الابتداع , و يرفضون كل ما هو جديد و يرفضون فكرة التحديث باعتبارها "بدعة".
قبل الثورة , كانوا وما ما يصرحون بأن العمل فى السياسة من المفاسد , و لكن بعد الثورة وجدنا أن كلامهم اختلف , فقد كونوا حزبين سياسيين هما: النور , و الفضيلة. و فى عدة مناسبات كانوا يرفعون العلم السعودى. هم أيضا يختلفون عن الأزهر, الأزهر الذى يمتاز بالاعتدال و السماحة مع المذاهب الأخرى.
فنلحظ أن العلاقة بين التيارات ليست سوية .. و هناك نصائح لتوحيد الحركة الاسلامية:
1 - تفعيل دور الأزهر من جديد
2 - تحقيق على الأقل الحد الأدنى من المعيشة للشعب
3 - تجديد الخطاب الدينى
4 - تفعيل القانون لأى خروجات عن تضاريس الحركة الاسلامية
فهناك إسلام واحد .. و لكن ثقافات إسلامية عديدة..
....
معلش طولت عليكم بس حاولت أجيب كل المواضيع المهمة التى تم ذكرها فى الأمسية
أشوفكم على خير ..
