Wednesday, August 8, 2012

لعبة Survivor على أوسع شوية!



حد في عيلتك بيتخانق ع الفاضية و المليانة؟ لأ Really  على الفاضية و المليانة, اللي هو ميكونش فيه سبب أصلاً, و تكون لسة صاحي من النوم و لسة مش مستوعب و تلاقيه بيتخانق معاك؟ أرجوكم حد يقول أيوة, مش عايزة أحس أني لوحدي اللي عايشة في الدوامة دي.

لو رديت بيتخانق معاك و لو مرديتش بيتخانق؟ لو سكتت بيتخانق و لو إتكلمت في حوار بيتخانق؟ طيب تمام.

أنا حاولت أتعامل مع الموقف بالعصبية, أنا اللي إتعصبت ع الفاضي. حاولت أتعامل بالهدوء و "التنفيض" الخناقة زادت. حل تالت؟ مفيش!

و قالك رمضان شهر التسامح! ده لو فيه تسامح أكتر من كده كنت ولعت في نفسي من التسامح. هو أينعم مش هستفيد حاجة من الفضفضة دي. لكن أهو أمشيه حل تالت بدل ما أنا قاعدة بشد في شعري.

الأحداث الحالية في البلد, مخلياني أبدأ أفكر جدياً في موضوع الهجرة. أصلها كده قفلت! و لا إيه؟ حد لسة شايف أمل في البلد دي؟ انا معدتش شايفة حاجة إطلاقاً. مفيش أمل في و لا شغل و لا حياة كريمة ده حتى أنك تفضل على قيد الحياة معدتش مضمونة في البلد. (أينعم, الأعمار بيد الله, لكن البلد بقت فخ كبير, أو لعبة Survivor على أوسع شوية).

المشكلة معدتش عارفة أحسبن على مين و لا أدعي على مين و لا أدعي لمين. اللي كنت مؤيداهم زمان يا إختفوا يا كل شوية يطلعوا يعملوا Show والناس تهيص. وحالياً الريس مش عايزة أجيب سيرته (مش خايفة و لا حاجة) بس أدعي عليه و أقول إيه و لا إيه و لا إيييييه.
و للتنبيه: أنا ضد شفيق برضة, عشان أنا عارفة الذكاء :)

أما بالنسبة لي أنا شخصياً, كنت بكتب -يا عيني- مجموعة قصص قصيرة و وقفت. كنت بترجم مقالات سياسية, ترجمتلي واحدة و كسلت, كنت بفكر أدور في المجلات على إيه المتاح للشغل إتخنقت. البلد و البيت كفيلين بأنهم يقضوا على ما تبقى مني.

الحل؟ مش عارفة أديني بحاول أسهر للصبح لوحدي في ملكوت الله, أتفرج على شروق الشمس و ألعب ع النت و أقرأ حاجات, و لكن هيهات. محتاجة أعيش لوحدي شوية عشان أرجع كما كنت. ده غير أن ورايا مشاوير كتيرة و مش عارفة أصحى أعملها.

و لسة برضة محدش قالي أدعي على مين؟ منك لله ياللي كنت السبب.

P.S: الصورة, عاجبني المج اللي فيها. محدش يقولي ألاقي مج زي ده فين؟ D:

6 comments:

  1. متدعيش على حد
    ادعي لنفسك وللي بتحبيهم وانتي بتشوفي الشروق وف وسط هيصة اللعب على النت افتكري حد وابعتيله كلمة تفرحه لما يشوفها ..
    هتحسي بفرق :))

    وآه بالمناسبة هما بس عاوزين يجوزوكي بسرعة فبيطفشوكي من البيت :D

    ReplyDelete
  2. Have you ever thought about trying to find yourself amidst all that craziness?
    I feel you and I kind of have the same fears and disappointments. Hopefully you will find your peace soon.

    ReplyDelete
  3. امتى الزمان يسمح يا جميل واعيش معاك على شط النيل الجو كله شروق والورد مال على الغصون والقمر طالع علينا والنسيم هالل علينا
    هكذا غنى عبد الوهاب فى الثلاثينيات ونحن فى الالفية الثانية نبكى وننوح .. .. ناموس الحياة يقول ان الامور تسئر من سئ الى اسوأ
    هونى عليكى الحال من بعضه

    ReplyDelete
  4. لالا انتى مش لوحدك يا رضوى اوعى تخافى والا تقلقى ابسلوتلى نو

    الواحد اصلا مابقاش فاهم ااااى حاجه بتحصل
    واللى يقولك فاهم يبقى بيستعبط
    احنا لنا الله

    ReplyDelete
  5. :)

    أنا زيك كدا و ربما أسوأ !

    نفسي أهاجر لنفسي و أٌقعد معاها لوحدي كدا :)

    أمنية جايز ...

    حاولي تندمجي . . حاولي .. ما احنا مخلوقين في الدنيا دي عشان نحاول !

    ربنا يعينك :*

    :)

    ReplyDelete
  6. يا بنتى أنتى كده فى رحمة , على الأقل بيستنوا لما تصحى وبعدين يتخانقوا معاكى , أنا بقى ممكن يصحونى يتخانقوا معايا شوية ويسبونى ويناموا هما

    لو فى يوم محدش اتخانق معايا لازم اروح اطمن عليهم أحسن يكون حد تعبان واهو كله بثوابه
    وربنا يعينك وتقدرى تتفاهمى معاهم

    ReplyDelete