Monday, February 4, 2013

في معرض الكتاب ..


امبارح كان اليوم السنوي ليا للغرق في الكتب و العودة بتشكيلة مذهلة .. كانت زيارتي السنوية لمعرض الكتاب في مدينة نصر!  هكلمكم عن الكتب اللي جبتها و عن تجربتي مع اليوم و عن معرض الكتاب بشكل عام.

الكتب اللي جبتها أولاً يعني، من المركز القومي للترجمة (كان عامل خصم 50 % فالزحمة كانت لا تطاق هناك، ممكن ده السبب اللي خلاني معرفش ألف فيه القسم بتاعهم اوي و أطلع بحاجات تانية. بس جبت من عندهم:


-أثر على الحائط (قصص) - فيرجينيا وولف

-الذرة الرفيعة الحمراء (رواية) - مو يان
-قصص خورخي لويس بورخيس
-انتصار الحضارة و تاريخ الشرق القديم - جيمس هنري برستيد
-فرسان الهيكل - ستيفين هوارث
-القصر – فرانس كافكا
-حامل الشمس ينهض و قصص أخرى و هي مختارات لكاتبات أمريكيات هنديات.


أما من مكتبة مصر، فكنت بنتقم لعدم مقدرتي شراء اعمال كثيرة لنجيب محفوظ بسبب احتكار الشروق لها و لأني مقدرش أدفع 50 جنيه في كتاب واحد فاشتريت له الأعمال التالية و كلهم مكملوش 50 جنيه! الأعمال:



بين القصرين، 
السكرية، 
قصر الشوق، 
زقاق المدق، 
السراب، 
المرايا، 
ميرامار، 
الحرافيش


وبعد جولة في المعرض وصلت لمكتبة الأسرة و اشتريت منها التالي:


-مجلد نظر - محي الدين اللباد

-نهر السماء (رواية) - فتحي إمبابي
- مذكرات شارلي شابلن
-الموسيقى في الحضارة الغربية - بول هنري لانج

ومن دور نشر متنوعة إشتريت:
-بيوت تسكنها الأرواح (قصص) - هويدا صالح

-ليلة العشق و الدم (رواية قصيرة) - إبراهيم عبد المجيد
-سر المعبد - ثروت الخرباوي
-قلب الأخوان - ثروت الخرباوي (أما نشوف الدوشة دي كلها على إيه بقى   (


وطبعاً اشتريت مجموعة كتب رائعة منها دون كيخوته بجانب شرائي لأعمال أصدقائي المنشورة بالمعرض مثل نوافذ مواربة و قصاصات أنثوية وغيرها، و لكني نسيت الكيس اللي فيه الحاجات دي مع أحد أصدقائي فأول ما أسترجعه هأكتب محتوياته.

المهم بالنسبة للمعرض،للأسف يتطلب أكتر من يوم عشان ألفه معرفتش أروح نص الأماكن اللي كنت عايزة أروحها أو أشتري أو ألف أكتر من كده، للأسف لو أنت مش من سكان القاهرة هتتعب لو عايز تشتري مجموعة كبيرة. و للأسف كمان مفيش تنظيم وكل خيمة أنت بتدخلها بالحظ و مش عارف إيه دور النشر اللي جواها، غير بعض الإستثناءات. و طبعاً المفروض يبقى فيه كذا خريطة في كذا مكان لمساعدة الناس عشان متتوهش، بس أهو نحمد ربنا على وجود المعرض من أساسه.


كان نفسي طبعاً أروح دار الهلال و سور الأزبكية، السور شفته بس مكنش عندي قدرة حتى أني ألف فيه، ودار الهلال ملقتهاش أصلاً، المعرض كان محتاج يومين لف عشان أعرف أجيب كل حاجة لكن مبسوطة بالغنيمة اللي عرفت أطلع بيها. يعني الكتب اللي طلعت بيها مع الكتب اللي عندي في البيت و لسة مقرأتهاش أعتقد يكفوني سنة بحالها ^_^

4 comments:

  1. يا بختك روحتى كان نفسى اروح فعلا :((

    ReplyDelete
    Replies
    1. والله المعرض فرصة جميلة فعلاً
      بس ان شاء الله تعوضها :)

      Delete
  2. ايه دا .. جباااااااارة :D
    انا بفكر اروح يوم السبت بس خايف تكون الكتب الحلوة اتنقضت خلاص .. يوم السبت اصلا آخر يوم

    ReplyDelete
    Replies
    1. لا متقلقش الكتب الحلوة بيجيبوا منها كميات كتيرة جداً
      أيا كان اللي عايزه هتلاقيه موجود .. المشكلة الوحيدة عدم التنظيم يعني :)

      Delete