يوم التدوين ضد الطائفية و التعصب
التعصب .. رغم إختلاف أشكاله و أنواعه الا أن أشهره و أخطره "الدينى" و بالذات هنا فى مصر .. للأسف
من الحاجات اللى لفتت انتباهى فى البداية للموضوع ده هو فيلم حسن و مرقص .. و رغم أنى فيه حاجات محبيتوش فيها .. بس حسيت أنه بين الصفات العامة للطرفين سواء مسلمين او مسيحيين ..و من قبل ما أشوفه الموضوع ده مكنش بيشكل ليا مشكلة شخصيا
بس بعدها بدأت أركز و لاحظت قد إيه احنا ناس غريبة و متناقضة ..
نقول كلنا مصريين بس لما تيجى تتكلم عن حد مسيحى , تقول هو كذا و كذا حلو جدا بس مسيحى ..
بتتكلم عن المسيحيين و كأنهم مش بشر زينا .. مش مصريين زينا , بالعكس احنا أجدادنا أقباط .. المصريين فى الأصل أقباط . إيه المشكلة يعنى ؟
و تلاقى ناس بتتعامل مع حد حلو جدا .. تعرف انه مسيحى تتقلب 180 درجة .. طيب الديانة بتفرق معاك فى ايه .. مأنت من شوية كان عاجبك جدا ّ!!
و الأمر نفسه للمسيحيين .. بس ربما ده بسببنا كمسلمين ان احنا وصلنالهم الاحساس "بالاضطهاد" فبقوا بيتعاملوا خوفا فى أوقات و ساعات حذرا و توقع الخيانة فى اوقات أخرى
إحنا مصريين .. و عايزين نغير من نظام , يبقى لازم نغير من نفسنا !!
مش لازم تبقى فيه أزمة هى اللى تجمعنا .. ليه منتجمعش دايما .. ليه ميكونش المسلمين و المسيحيين ايد واحدة مش مجرد شعارات واخدانا بيها الحماسة و بنكررها و خلاص ..
بس الصراحة لو جينا للحق .. الأحداث الأخيرة دى كان ليهم حق الاحتجاج بسببها , من اول السنة و هم مشاكل بتحصلهم شوفوا السنة دى كم كنيسة حصلت فيها مشكلة و لا حد رجعلهم حقوقهم و شوفوا مواضيع كاميليا و عبير اللى قلبت الدنيا .. و المشكلة احنا مش بنحاول نفهم , نقولك فتنة طائفية و ننسى إنهم مصريين , و نرد عليهم و بطريقة أعنف .. و بعدين ؟؟!!
لو فضلنا نرد على بعض .. بعدين ؟
مش مهم مين اللى بدأ صدقونى و لا مهم مين اللى إستمر .. المهم هنوصل لفين ؟
ربنا يحمينا مسلمين و مسيحين مصريين ..
انا بحب فيلم حسن ومرقص جدا
ReplyDeleteبجد بيبن ان علاقتهم حلوه اوى
وفى المقابل بيوريكى ناس تانيه من الطرفين بيتعاملوا بطريقه مضهده
يعنى وراكى ان الحلو والوحش
عشان ده الطبيعى
فى الطرفين هتلاقى ناس متعصبين اوى لدينهم
رغم انك لو متعصب لدينك صح
هتفهم ان الدين قالنا اننا نحترم جميع الاديان السماويه ونعامل غيرنا معامله لربنا بخلاف ايه ديانته
انا يمكن اصلا متربيه مع مسيحين بحكم الجيره
وعمر ما فكرت ان فى اختلاف بينا نهائى
ولا مين واخد حقوقه ومين مش واخده
بالعكس كأننا بجد عيله واحده وقت ما بنحتاجهم بنلاقيهم والعكس صحيح
هو كل فتره كده بيحصل هوجه فى الموضوع ده
يمكن لان دى القشه اللى هتقسمنا وناس كتير بتلعب عليها
فى النهايه
ان ربنا خلقنا كلنا سواء
والديانه دى حريه شخصيه
كل واحد يعامل اللى قدامه بما يرضى الله من غير ما يبص على ديانته ايه هى
وقتها اكيد حياتنا هتبقى افضل كتير
موضوعك جميل اوى يا رضوى
جميل يارضوى .. الموضوع دة فعلاً غريب ومنتشر أوى مبدأ التناقض فى المعاملة دة
ReplyDeleteبس كلمة قبطى لغويّاً تعنى مـصــرى
دة القصد من إننا أقباط .. مش يغعنى إن أصلنا مسيحيين
فعلا لو كان القانون بيتطبق من أول ما يحصل أي حدث وبكل سرعة وبكل حيادية , مكنش هيحصل أي فتنة ولا مشاكل
ReplyDeleteالعدل وتطبيق القانون هو الحل