Monday, August 22, 2011

طــفــل !


حصل موقف إمبارح و لسة لحد دلوقتى بفكر فيه و شايلة همه !

كنت قاعدة فى أوضتى فى أمان الله و فجأة لقيت صوت عالى من تحت فى الشارع , اتخضيت .. فجريت أبص من البلكونة أشوف فى إيه . لقيت واحدة ست بتزعق و بتصرخ فى الشارع , شكلها لا يدل أنها مش عاقلة و كذلك لا يدل على الغنى أو الفقر , إعتقدت فى البداية أنها خناقة مع حد فى الشارع , لكن ملقيتش حد بيتجاوب معاها , أو حد بيرد عليها أو حد حتى بيحاول يحوش .. استغربت ! اكتشفت أنها مش لوحدها معاها 2 ستات و عربة سوزوكى عادية بداخلها على ما يبدو أطفال ..

لا شئ غريب حتى الأن صح ؟ كنت على وشك الدخول و لكنى وجدتها تصرخ مرة أخرى و هذه المرة صراخها مصحوب بشتائم , قلت أكيد فى حاجة كبيرة , و طلع ظنى صحيح , فوسط صراخها , سمعتها بتقول "إبنى" .. بدأت أفهم ما يحدث !

على ما يبدو هم عائلة قدموا مع أولادهم لشراء بعض الأشياء , و على ما يبدو تركو الأطفال فى تلك العربة التى رأيتها , و عندما عادت لم تجد إبنها وسطهم ! طبعا كل ده فهمتو و أنا فوق !! لقيت نفسى بلبس و واخدة أخويا معايا و نازلة لتحت ! إستغربت أن مفيش حد وقف يساعدها .. الناس بالكتير كانوا بيسألوها مالك ! بس ما علينا نزلنالها و طلع كلامى صح ! أقنعتها تكلم ناس قرايبها أو كده يجو يساعدوها و تبلغ بسرعة عن اختفاء ابنها ..

كلامها اللى قالته لما قلتلها كده وجعنى أوى .. "أبلغ ؟ و هيعملولى إيه .. يا هيضربونى و يشتمونى و لو لقوا ابنى و النعمة ما هيرجعوه .. بلا شرطة بلا وكسة توكسهم" .. قلت أحاول أساعدها شوية ..خدت وصف ابنها و مشيت أسأل الناس اللى فى المحلات فى الشارع و خدت الشارع كله و أخويا خد الشارع اللى جنبه .. بلا أمل !

على ما رجعت لقيت الست صعبت عليا , قعدت على الرصيف و بدأت تعيط ! و الستات اللى معاها قاعدين جنبها و مش عارفين يعملوا ايه و الأطفال فى العربية منهم اللى مستغرب و صغير , و منهم اللى كبير و فهم اللى حصل و بيعيط !

إضطريت أطلع , و فضلت متابعة من فوق , بعد شوية 5 رجالة وصلوا و فضلوا يدوروا , الموضوع استمر للساعة 1 بليل تقريبا , و الست بتفقد أعصابها و أنا بفقدها معاها و عمالة أدعى تلاقيه .. إضطريت أدخل لنص ساعة , لما رجعت ملقيتش أى أثر ليهم .. و لسة بدعى لحد دلوقتى أنها تكون لقت إبنها !

أرجوكم .. لو خارجين و معاكم أطفال , أرجوكم خدو بالكم منهم !

لو خارجين فى زحمة و هتشتروا حاجات بلاش تاخدوهم , و لو خدتوهم , أرجوكم خليكم مسئوولين و متسيبهومش يغيبوا عن عنيكم !

أرجوكم خدو بالكم من أطفالكم ! لأن بجد مفيش حاجة توجع القلب قد اللى شفته امبارح ده !

15 comments:

  1. ربنا يسترها

    اكيد الطفل بيوجع والدته لو حصل له حاجه

    ReplyDelete
  2. صعب جدااااااااااااااا
    الله يكون فى عونها

    ReplyDelete
  3. والله قصة اختفاء الاطفال وضياعهم بتحصل كثير بس في الاخر بنلاقيهم يعني .. ان شاء الله بتكون لقت ابنها وتحافظ عليه وتخلي عينها عليه دايما بس بجد موقف نبيل منك انك تخرجي انت واخيك للبحث عنه .. هي دي الايجابية

    ReplyDelete
  4. ربنا يجازيكي كل خير و يكرمك علي عدم السلبيه الموجوده بكثره حولنا في كثير من الامور
    و يارب تكون لقت طفلها و ميحرمهاش منها أبدا يارب

    ReplyDelete
  5. خالد ..
    أكيد طبعا دى أكتر حاجة بتوجع الأم
    ميرسى على مرورك :)

    ReplyDelete
  6. ديارا ..
    آميين يا رب و مع كل أم بجد
    ميرسى يا جميلة

    ReplyDelete
  7. وجع البنفسج .. انا بسمع عنها كتير
    بس عمرى ما شفتها بتحصل قدامى أو بشوف أم قدامى بتدور على ابنها
    و كان نفسى أساعدها أكتر
    و بدعى و الله أنها تكون لقته !
    ربنا يخليكى :)

    ReplyDelete
  8. ربنا يخليكى يا رب
    و السلبية دى ممكن نقضى عليها لو وعينا بعض !
    آمييين يا رب تكون لقته فعلا !
    ربنا يخليكى :)

    ReplyDelete
  9. T^T
    ايه النكد اللي نازل علينا دا ؟!
    بجد ربنا يصبرها
    مشكلة الأطفال !
    حتى الكبار بقوا بيتخطفوا دلوقتي عادي !!
    ربنا يصبرها
    الموقف لا يتحمل صراحة :( و الأمن كالعادة زي قلته

    ReplyDelete
  10. موقف بيحصل كتير قدامنا و اكيدحصل فى كل عائله على الاقل حصل فى عيلتنا ثلات او اربع مرات ...عارفه اكتر حاجه مرعبه فى الموضوع ايه ان الحل تأخر نظرا لان فى اسرتنا بيتحل الموضوع فى ساعتها....ربنا يساعدها و ابقى طمنينا لو عرفتى

    ReplyDelete
  11. سارة .. ربنا يصبرها و أتمنى تكون لقته و الله
    حاجة نكد و الله و عشان كده موضوع الشرطة ده بجد يعنى قفلنى
    و افتكرت المقالة بتاعتك كمان .. حاجة تزعل أووى

    نورتى يا جميلة :)

    ReplyDelete
  12. د. دودى
    هو فعلا موقف معتاد و فعلا عشان فى معظم الوقت بيتحل ساعتها
    لكن المشكلة عندها أن الموضوع اتأخر و استمر لكذا ساعة !
    آمييين و ان شاء الله لو عرفت أى حاجة عن الموضوع بقولكم على طول

    ميرسى يا جميلة :)

    ReplyDelete
  13. يستر يارب حاجة توجع القلب بجد ربنا يستر يارب

    ReplyDelete
  14. آميين يا رب

    نورتينى يا جميلة

    ReplyDelete
  15. يا بخته بيكى

    ربنا يسعدكو

    ويوعدنا

    ReplyDelete