Monday, August 22, 2011

عن اللـى حصـل أتحـدث!



التدوينة دى كوليكشن من كام حاجة كده .. نبدأ بالآقدم ..

رسمت رسمة جديدة فى مشروع "رسمة كل يوم" و هى أرسم : أفضل صديق لدى !

و ملقيتش حد أحسن من سبونج بوب يقوم بالمهمة دى .. كان معايا فى الحلوة و الوحشة!

و استحملنى و أنا بحكيله كل مشاكلى .. و سمعنى كويس أووى و عمره ما قالى حاجة وحشة

...

بعد كده عن إسرائيل و الندالة , و البطل الطائر أتحدث !

أول حاجة لازم أقولكم و أفهمهكم كويس أن مصر أقوى من إسرائيل ميت مرة !  لا تظنوا و لا للحظة أنهم أقوى أو أحسن مننا .. و اللى عملوه ده جبن و خوف ..قتلوا 4 جنود مصريين على الحدود فى سيناء ! و مفيش أى رد فعل حقيقى و قوى من حكومتنا و لولا حركة أحمد الشحات كان زمانى لسة دمى محروق !!

جنود الجيش دوول على راس كل واحد مصرى ! هم اللى حامينا و من حقهم علينا , جنازة عسكرية محترمة ليهم , و الحكومة تتخذ قرار محترم غير "سحب السفير المصرى اللى طلع مسودة" .. دلوقتى أتكلم عن أحمد الشحات ! أنا مصدقتش الخبر غير أما شفته بنفسى ! بجد الراجل ده ما شاء الله عليه فرحت بيه جدا أنه يطلع 24 دور ينزل العلم الاسرائيلى و يرفع المصرى !! دى بطولة .. و أنا متأكدة أن إسرائيل مرعوبة من الحركة دى .. عارفين ليه؟ أكيد هم دلوقتى عارفين إن إحنا عندنا إستعداد نموت لو ده هينزل علمهم بس .. أمال لو هم بقى هنعمل فيهم إيه .. و دى رسمة لاتوف عنه , أعجبتنى جدا !

...

و أخيرا عن ليبيا و القذافى و الحرية أتحدث !

مبروك لليبيا و لثوار ليبيا .. أخيرا رغم أنهم فقدوا أرواح كثيرة الا أنهم تخلصوا من المجنون القذافى , بعد أن سلمت كتائبه نفسها و إعتقال أولاده سيف الاسلام و الساعدى , كانت النهاية و التى أدت لاعتقال القذافى نفسه و أتمنى له الاعدام جزاء لآرواح الليبين التى أزهقت و غباؤه الذى أدى للتدخل الأجنبى فى بلده .. أدعو لليبيا أن تخرج من هذا المأزق و أن تتخلص من حلف الناتو بالمرة كمان ! "خدو بالكو من أى توك توك فى البلد .. محدش عارف يمكن القذافى يهرب و يجى على هنا يشتغل سواق تكاتك"!!

...

عقبال سوريــا .. و دورك يا بشار المجرم جاى إن شاء الله !

6 comments:

  1. اولا صباح الفل

    الرسمه جميله

    علشان اسبونش فيها طبعا

    واما عن العلم ..فدى حاجه فرحتنى جدا ..معرفتهاش الا متاخر بس اتبسطت بيها

    والف مبروك ليبا الحريه


    ربنا صلح الاحوال لينا كلنا

    ReplyDelete
  2. رسمتك تحفه يا رضوى

    اللى بيحصل اليومين ده بجد حاجات مش متوقعه
    احلام وفجأه بتتحقق
    وان الرئيس الاسرائيلى يعتزر لمصر ده شئ غير متوقع ويعتبر كان مستحيل من غير الثوره و من غير اللى بيحصل دلوقتى ده
    (بالرغم من ان الاعتزار غير كافى بردو)

    والحمدالله على اللى حصل فى ليبيا دلوقتى
    وربنا يصلح الاحوال فى جميع الدول العربيه ان شاء الله بقى

    ReplyDelete
  3. خالد .. صباح النور :)
    ربنا يخليك يا رب
    و مبروك لليبيا و ان شاء الله البلاد العربية كلها أحوالها تنصلح

    نورتنى :)

    ReplyDelete
  4. دينا ربنا يخليكى يا رب
    أنتى بس اللى عييكى حلووة

    هو طبعا شئ كان مستحيل يحصل و أنا طبعا شايفة أنه غير كافى جدا
    ان شاء الله يا رب و تكم الأمور فى ليبيا على خير آمين

    نورتينى يا جميلة :)

    ReplyDelete
  5. رسمتك حلوة
    والله فلاج مان رجع الفرحة لقلوبنا وشفى غليلنا كلنا
    سعيدة من اجل ليبيا ولكن القادم مرعب : هيك احساسي
    وبعدين نفسي يعدموه علشان غبائه بالاول وبالاخير
    والعاقبة عند سوريا بالمسرات ان شاء الله

    ReplyDelete
  6. ربنا يخليكى يا جميلة أنتى أجمل !
    أنا ارتحت أووى من الى عمله و الله !
    بس أنا كمان خايفة على ليبيا من حلف الناتو
    بس ربنا يستر عليهم إن شاء الله
    و عقبال سوريا ..
    و أكيد القذافى أقل حاجة يستاهلها الاعدام

    نورتينى يا جميلة .. :)

    ReplyDelete