إلى المجلس العسكرى :
دى مجرد رسالة صغيرة من مواطنة مصرية . و لا هتشتم و لا هتسب و لا "هتهين المجلس العسكرى" .. مجرد بتسأل بس !
أكيد حضراتكم فاكرين الثورة ! .. مين قام بيها ؟ كانت ضد مين ؟ و كانت عشان ايه ؟
اللى قام بيها ؟ الثوار و النشطاء اللى بيتسجنوا و بيتحاكموا !
كانت ضد مين ؟ مبارك و أولاده و أعوانه اللى مفيش ذرة عدل فى محاكماتهم أو القرارات الصادرة ضدهم !
كانت عشان إيه ؟ عشان نلغى نظام مبارك و نعيش فى بلد نضيفة .. رغم ان ده متحققش الصراحة !!
الشهداء ! .. فاكرينهم حضراتكم طبعا !! .. أيوون اللى أنتوا أديتلهم التحية !!
فين حقوقهم اللى مرجعتش ؟ اللى قتلوهم بياخدوا براءة واحد ورا التانى و لسة بيتعاملوا كما لو أنهم ملوك .. أهاليهم بيتبهدلوا لمجرد أنهم عايزين حق ولادهم !! أكتر من 800 شهيد .. فين حقهم ؟
طيب المصابين ؟ اللى مش عارفين يتعالجوا دول .. هم مطلبوش يتعالجوا زى مبارك , كل اللى طلبوه أنهم يتعالجوا .. و بس !!
الناشطين و الثوار .. و البهدلة اللى بيتعرضوا ليها يوميا , من تعقب و ذل و بهدلة و ضرب و محاكمات عسكرية .. ليه ؟ من أهداف الثورة (اللى مفروض أنها اتحققت) حرية الرأى و التعبير .. و لما دول ينتقدوا حضراتكم , معتقدش أن ده يدعو أنكم تعملوا فيهم كده .. و لما ينتقدوا حكمكم .. أعتقد أن حضراتكم مش هدفكم الحكم كما سبق و ذكرتكم .. مش كده ؟
طيب ليه متهمى موقعة الجمل و قتل الشهداء و سرقة أموال الدولة و نشر أعمال البلطجة .. مش بيتحاكموا بنفس القسوة و الشدة دى ؟
مثال على البلطجة (أبناء مبارك) اللى ليهم فيديوهات حية و هم بيضربوا ثوار و أهالى شهداء و ناشرين بيانات و كلام فيه لهجة أشد ميت مرة من أى حد من النشطاء استخدمها , ليه مقربتوش منهم ؟
ليه مازلتم ماشيين على أسس مبارك ؟ أرجوكم بلاش تحسسونى أن الثورة كانت هباء !! أرجوكم بلاش تخلونى أندم أنى وثقت فيكم يوم ما قلتم أنكم بتساندو الثوار و الثورة و هدفكم لم و لن يكون الحكم , أرجوكم بلاش تحسسونى أن مفيش أى فرق !!
ليه بتكرهو الشارع المصرى فى الثورة و هى أملهم الوحيد ؟
ليه مشفناش أى تطور جديد فى الفترة اللى أنتو ماسكين فيها , بينما أنكم قلتم أن هيحصل تحقيق للمطالب , بينما كل اللى شايفاه مبارك نايم على سرير جوا قفص من غير ما تكون فيه محاكمة فعلية , و ناخد بالنا أنه عسكرى و بيتحاكم محاكمة مدنية , و النشطاء المدنيين بيتحاكموا محاكمة عسكرية .. و هو موضوع يلخبط الصراحة !!
ليه الداخلية هيا هيا .. ليه الاعلام هو هو ؟
ليه و ليه و ليه .. أسئلة كتيرة جدا !!
فاتت 6 شهور و لم يحدث أى تطور !
إلى متى يجب أن ننتظر .. هل يجب أن ننتظر حتى تْقتل الثورة تماما ؟
اقول ايه بعد كلامك
ReplyDeleteشئ مفجع الصراحة
وضعنا صعب اوى
والفساد طلع اكبر بكتير من تصوراتنا
حاجة مؤلمة اووووووووى
ياااااااااارب هون علينا
مَعرفش مُؤيديين مُبارك جايبيين البَجاحه
ReplyDeleteو الفَراغ والقِوَّه و الإستفزاز دَه كُله منين !
..
والمَجلس يا حبة عين الشَّعب بيغني
أنا بين ناريين ..
وحبيبي سَابني
أَروحله فِين ؟ ! :D
الكلام اللى قولتيه يا رضوى للاسف كلنا عايزين نقوله
ReplyDeleteبس ياريت لما نقوله يجيب نتيجه
الواحد بقى خايف على البلد دى اوى
مش عارفين رايحه لفين
وخايفين على نفسنا معاها
ربنا يستر ع اللى جاى
الله المستعان
ReplyDelete@Sara Adel:
ReplyDeleteأنا كت متخيلة أن الفساد كتيير كده
بس مكنتش متخيلة أن القضاء عليه بجد هيبقى صعب أوى كده
آمييين يارب
نورتينى بمرورك :)
@Sara:
ReplyDeleteمؤيدين مبارك دول .. أنا مش عارفة تصنيفهم إيه بجد !!
استفزاز و قلة أدب لا متناهية !!
هههههههههههه المهم هو يروح بس و بعدين نشوف هيروحولو فين !
@Dina:
ReplyDeleteأنا و الله خايفة على البلد و الناس اللى فيها
ماهو الأمور لو استمرت كده بجد
هنبقى عملنا ايه و غيرنا ايه ؟
و ان ايه لازمتها ثورة .. مادام مش هنعمل تغيير بجد
ربنا يستر بجد
اتفقعتي زيي بالظبط:D
ReplyDeleteأسئلة بجد تحتاج إلى إجابات و لم يعد السكوت عنها أمر طبيعي !
أنا مفقوعة بجد !! بس عارفة بحاول أتمالك نفسى !!
ReplyDeleteياريت أصلا الواحد قادر يسألها مش حتى بلاقى ليها إجابة !