Tuesday, August 9, 2011

عن برما يقابل ريا و سكينة .. Review


بما أنى قررت أنى هعمل زى ريفيو عن كل كتاب أقراه , فهبدأ بكتاب أنا لسة مخلصاه و هو لكاتب من كتابى المفضلين عمر طاهر .. هو : برما يقابل ريا و سكينة

...

برما هو شخصية تخيلها عمر طاهر و معظم الكتاب يتلخص فى حواراته الطريفة مع برما أو مع أراء برما التى يتفضل علينا و يشاركنا بها .. هو شخصية مصرية أصيلة أعتقد أنها توجد فى كل واحد منا .. بل أن متأكدة أن كل منا له برما الخاص به , الذى نادرا ما يرى الضوء و لكننا نشعر به فى المواقف "البايخة"

القسم الأول , عن مواضيع اجتماعية مختلفة , منها وصف واقعى جدا للمصريين و الحالة فى مصر , و أعتقد أن الكتاب "جاب مصر بالحتة" و خصوصا فى الكام سنة الأخيرة , و القسم التانى أراء متنوعة لبرما أو لعمر طاهر عن مواضيع كثيرة منها السعادة , الشوك .. و غيرها. و طبعا مع الكتاب , كتيب صغير فيه بعض أقوال برما , التى ورد ذكر معظمها فى الكتاب.

الكتاب يتميز بتلك النبرة الساخرة "بس من غير ما يغلط فى حد" و واقعى جدا , فلن تشعر أنه مبالغ فيه أو أنه أهمل ذكر بعض الأشياء , ستجد أن الكتاب يتحدث عن حالة مصر صحيا و سياسيا و اجتماعيا و ثقافيا من غير ما يكون مبالغ فيه ..

أعجبنى فيه؟

المواضيع التى تناولها و أسلوبه الذى قد أصفه بالسهل الممتنع , بمجرد أن تقرأه تشعر بأن الموضوع مألوف لك و لكن لو حاولت الكتابة عنه بنفس الأسلوب ستواجهك صعوبة بلا شك. و ما أعجبنى التشبيهات التى استخدمها و لكنى قد أصنفها مع الأسلوب .. فأنا عاشقة لأسلوب عمر طاهر بالفعل.

تقييمى للكتاب:  5:5و بجدارة.

إن قررت قراءة هذا الكتاب , إقرأه فى وقت متأخر أو إن كنت بحاجة للضحك.

..

أول مرة أكتب ريفيو بس أعتقد أنى اتكلمت عن الكتاب الجميل ده كوويس يعنى من غير ما أحرق عليكم منه حاجة =)

جارى حاليا قراءة رواية "بــازل" لــ حسين عبد العليم.

8 comments:

  1. اتكلمتى عن الكتاب بطريقه حلوه اوى يارضوى
    انا كمان بحب كتابات عمر طاهر جدااااااااا
    وطريقته ممتعه اوى تجبرك انك تستمرى فى القرأه عشان تعرفى هيتكلم عن ايه تانى وازاى
    ان شاء الله اقراه قريب

    تسلم ايدك يا جميله :))

    ReplyDelete
  2. كتاب اجتماعي سياسي ساخر

    وصفتيه بشكل جميل .. أجزت وأوجزت

    ReplyDelete
  3. ربنا يخليكى يا دينا
    أنا بحب كتاباته و كتبه جدا .. و فعلا أسلوبه رائع
    خلانى أخلص الكتاب فى قعدة :D
    ان شاء الله لازم تقريه قريب..
    ميرسى يا جميلة =)

    ReplyDelete
  4. ميرسى يا هبة ..
    شرفتينى بمرورك يا جميلة =)

    ReplyDelete
  5. عجبتنى اوى الفكره يا رضوى وعجبنى طرحك للموضوع كمان

    تسلم ايدك يا قمراية ^^

    ReplyDelete
  6. ربنا يخليكى يا جميلة
    و مبسوطة انها عجبتك =)

    ReplyDelete
  7. فعلاً عمر طاهر كتاباته رائعة :)
    لقيت الكتاب دا في المكتبة أول امبارح و كنت هجيبه بس قلت لما أشوفه و أعاينه ع النت الأول و أقرأ الريفيو بتاعتك هههههههههههه
    ماجبتش كتاب ورقي قبل كدا لعمر طاهر على فكرة
    كله من ع الكمبيوتر :P
    و بصراحة عايزة أجيب له كتاب لأنه كاتب ساخر متميز
    شكل الكتاب رائع فعلاً

    ميرسي ع الريفيو يا جميلة ، كملي :)
    تحيتي لكِ ^^

    ReplyDelete
  8. انا ده اتحرجت و الله .. لا بصراحة عمر طاهر يستاهل
    أنا عندى له كتابين ورقيين : ده و رصف مصر
    و الاتنين أحلى من بعض بجد :D
    بس هو كتاب مسلى أووى فعلا
    و ان شاء الله تستمتعى بيه

    ربنا يخليكى يا جميلة و ميرسى ليكى على رأيك
    =)

    ReplyDelete