الحيــاة بقـى لونهـا بمـبى ..

الوردى ..

ده جزء من حملة ألوان .. للكتابة عن ألوانك المفضة

أفضل ألوانى على الاطلاق .. لون الرقة و الجمال و الحب. لون بيهدينى و يحمسنى فى نفس الوقت. مش فاكرة إمتى قررت أن يكون ده لونى المفضل, بس أعتقد من طفولتى كنت معجبة بباربى المميزة بلبسها الوردى .. و من ساعتها ممكن بطلت باربى لكن مبطلتش اللون الوردى.

اللون ده بيفكرنى بالطفولة و السعادة أكتر من أى حاجة تانية. هو إختيارى الأول فى كل حاجة ابتداءا بلبسى انتهاء بحيطان غرفتى. أكتر تعليق بيجيلى فى حياتى "مش هتغيرى اللون الوردى ده" صراحة بحاول بس مش بعرف أعمل إيه, ده كفاية إن سعاد حسنى غنتله :)

و عشان كده جايبة شوية معلومات عن لونى المفضل :

· كانوا بيستخدموه فى بعض السجون لتهدئة نوبات غضب المساجين

· الفيونكة الوردي المشهوردة: دى معروفة على مستوى العالم بانها لحملة التوعية ضد سرطان الصدر.

· فى اليابان, اللون الوردى ده له دلالة رجولية كمان, بيقولو أن الربيع لما أشجار الكرز بتزهر (دى شجرتى المفضلة طبعا لأن كلها وردى) بيقولو أن ده بيمثل المحاربين اللى ماتو فى الحرب فى شبابهم (الساموراى)

· مدينة جايبور فى الهند, اسمها المدينة الوردية بسبب انتشار اللون فى الشوارع, المبانى, المعابد, المحلات ...إلخ

· الصينين مكانوش يعرفو اللون الوردى لحد ما حصل اتصال بينهم و بين الثقافة الغربية و كانوا بيسموه "اللون الأجنبى"

· مراكش دى مدينة كمان اسمها المدينة الوردية بسبب مبانيها الوردية

· فى الديانة المسيحية: اللون الوردى بيرمز للسعادة

· المثلث الوردى: بدأ عندما استخدمه الألمان النازيون لما كانوا بيحبسو الرجال الشواذ و كانو بيجبروهم على ارتدائه, دلوقتى مازالوا بيرتدوه بس بعد ما غيروا فى شكله شوية و بقى علامة فخر لهم

· السيدة الأولى, مامى أيزنهاور, عرفت بأسم مامى بينك, من كتر ما كانت بتلبسه

· اللون الوردى بيشجع الناس على أنهم يتعاملو بلطف أكتر من أى لون تانى

· فى دراسات أثبتت أن رافعى الأثقال الرجال بيفقدوا قوتهم فى الغرف الوردية و العكس بالنسبة للنساء

· الحلويات بيبقى طعمها أحلى لما تكون فى علب وردية أو مقدمة على أطباق وردية, لأن اللون الوردى بيشجع على أكل الحلويات.

دى بعض المعلومات المختلفة اللى جمعتها عن اللون ده :)

لتكون حياتكم كلها وردى × وردى