أنا أطالب, إذن أنا بلطجى

أنا أطالب بحقوقى إذن أنا بلطجى ..

أنا أحتج و أتظاهر إذن أنا أنا بلطجى

أنا أعترض إذن أنا بلطجى

ده تقريبا المبدأ اللى ممشينه فى البلد الأيام دى .. فجأة المتظاهرين بقو بلطجية و إذ فجأة رجالة" الـ ... " بقو مش البلطجية .. فجأة كلمة اللى فى التحرير بقت شتيمة .. فجأة واحد نازل يتظاهر يعتقلوه و متعرفش هو فين لحد دلوقتى و يتحبس حتى من غير ما يتسمحله أنه يجيب محامى يدافع عنه

تعالوا نراجع مع بعض الطلبات اللى قامت عشانها ثورة 25 يناير :

1-تنحى محمد حسنى مبارك عن الحكم نهائيا

2-إقالة الحكومة وتشكيل حكومة وفاق وطنى سريعا من شرفاء البلد

3-حل مجلسى الشعب والشورى وإجراء انتخابات حره ونزيهة فى اقرب فرصة

4-إطلاق سراح جميع المعتقلين السياسيين ممن ليس عليهم احكام جنائي

5-محاكمة كل رموز الفساد والمستفيدين منه وحصر ثرواتهم ومصادرتها لخزانة الدولة

6-الغاء قانون الطوارئ فى البلاد و حل جهاز أمن الدولة

7-تشكيل لجنة من خبراء الدستور وأساتذة القانون الشرفاء وكبار القضاه للعمل على صياغة دستور جديد

8-إجراء تعديل فورى فى المواد المعيبة فى الدستور 66 و67و5و88و 179 لضمان انتخابات رئاسة حره

9-الغاء كل القرارات التى فرضتها الحكومة للاستفادة منها كقانون الضرائب وقانون المرور والسيارات

10-تنفيذ كل احكام القضاء واحترامها واعادة هيبته كسلطه مستقله 

11-إلغاء كل الاتفاقيات التى تمس امن وسلامة الدولة او تضره فى اقتصاده 

12-توفير حد ادنى من الاجور 1200 جنيه لضمان حياه كريمة لأهل مصر

13-محاربة الغلاء الفاحش الذى حل بالبلاد وعدم ربط رفع الاجور بغلاء العيشة

و تعالوا نشوف ايه اللى اتحقق منهم ؟ 

1-     تنحى مبارك و مكوثه فى شرم الشيخ للعلاج على نفقة الدولة مع عدم محاكمته

2-     اقالة الحكومة و حل المجالس

3-     ترقيع الدستور

4-     حل جهاز امن الدولة مع إبداله بجهاز أسوأ منه

حاجة مشرفة طبعا صح ؟

و بعدين لما تقول نرجع للميدان .. يطلعوا يقولوا بتوقف عجلة الانتاج .. احنا لو قعدنا فى بيوتنا مش هيبقى فى عجلة .. شوفوا قد ايه محكوم عليهم غيابيا و غير متواجدين .. شوفوا قد إيه أهالى شهداء مش قادرين ياخدوا حقوق أولادهم .. شوفوا قد ايه ناشطين و شباب عادى بيتسجنوا و يختفوا م غير أى اتهام لمجرد أنهم طالبوا بحاجة .. شوفوا تعاملات الداخلية فى أى موقف قريبا من بعد الثورة و هتفهموا !!

لؤى و غيره كتير ممكن فى عشرات الأسامى اللى مسمعناش عنها و للأسف ممكن منعرفهاش .. ضحايا لنظام لسة مقدرناش نسقطه .. ممكن شلنا راس بس جات راس تانية جواها نفس الدماغ برضة !!!

لو بتوع التحرير بلطجية عشان ناس جدعة و وطنية و عايزة تنقذ بلدها ..

يبقى أنا فخورة أنى بلطجية منهم !!

و إن شاء الله دم الشهداء مش هيروح هدر .. و هنرجع حقهم هم و لؤى و اللى زيه

و هنرجع حق مصر ..