Friday, July 22, 2011

الضغط و السكر و الذى منه !!


لاحظت مؤخرا أنه لا بد من أنى لا أفقه شيئا فى السياسة .. هذا صحيح , فكيف لحكومتنا المبجلة التى تعرف كل شئ بدءآ بعدم وجود قناصة و انتهاءآ باستبعاد وزراء لشئ الحكومة تفعله "عينى عينك" ..كيف لى أنا أن أعارضها و أتسائل كيف تم هذا و ذاك ..

حكومة مجمل تصريحاتها "قول اللى فى نفسك و برضة مش هنعمله" , حكومة أنت كشعب تطلب شيئا فينفذوا شيئا أخر لم يكن فى الحسبان "حاسيين بينا و ملهوفين علينا" , حكومة لن تقوى على فهمها , لأنها لم تتوصل لذلك بعد !!

حكومتى العزيزة , كام سؤال صغير يضافوا الى مجموعة الأسئلة التى أنا على يقين أنها بدأت تتكدس امام مكتب "الحكومة" .. مش عمو مبارك بطل حربى و عايزين تعملولو جنازة عسكرية , طيب ليه ميتحاكمش عسكرى بالمرة , و لا أقولكو اقتراح أحلى , ليه متحاكمش أصلا ؟ .. سؤال وحش صح ؟

طيب نروح لحاجة أسهل , لماذا تلقون بتصريحات تتنافر و تتشابك و فى النهاية لا تتوافق مع بعضها البعض , فلان يطلع فى قناة يقول "احنا أوقفنا كذا و كذا .." و فلان أخر يطلع على قناة اخرى فى نفس ذات التوقيت لينفى ما قاله فلان الأولانى .. إلخ إلخ إلخ من المواقف الطريفة , أنا متأكدة انكو عايزين تعملوا جو فرفشة بما اننا مخنوقين و عايزين تغيير بقى , بس مش شايفين كده أوفر .. بقيتوا أرخم من مسلسلات رمضان !!

اممممم , ده وحش ؟ اللى بعده ..

الدكتور حازم عبد العظيم , يهيألى أن موضوعه غريب نوعا ما , فها انتم لا تقبلونه كوزير "لاشتباهه بالتعامل مع شركة اسرائيلية" بينما حكومتى العزيزة مخلية اسرائيل "منورة بفلوسنا .. غاز و كهربا و كل ما يشتهوه " .. فى تفسير و لا أنا هفضل أسأل كتير ؟

سؤال أخر .. اسم مبارك و المنشآت العامة !!

لما من الأساس ينسب أى شئ له ؟ لم يكن بطل حرب "بلاش فشر و الكلام اللى حاطينه فى كتب التاريخ" و لم يكن رجل يفخر به شعبه .. بالعكس خلعوه "بالجزمة" .. لماذا إذا سيعود إسمه على الميادين و المنشأت العامة .. هو عمل حاجة جديدة و أنا معرفش ؟ يعنى اكتشف نوع غيبوبة جديد فى شرم الشيخ ؟ أو استضاف السياح ؟ مانا لازم أفهم هو عمل ايه ؟

قتلة الثوار و محاكماتهم "أو بالأصح عدم محاكمتهم" .. و ترقيتهم فى حالات أخرى و براءتهم .. بجد يا حكومة ده أكتر موقف حبيتك فيه !!

لاحظت قد ايه خايفين على شعب مصر و حقوق الشهداء , يعنى واحد زى "من دون ذكر أسماء" (الكومى) اللى قتل الشهداء يتم ترقيته و ياخد مرتب أضعاف أضعاف اللى بياخده .. دى مكافأة و لا فى خطة خمسية جديدة للتخليص على الشعب المصرى ؟ و غيره من اللى لم يتم محاكمتهم أصلا , و اللى اتحاكموا و طلعوا براءة .. و طبعا مش هتكلم عن الوزراء السابقين اللى طلعوا زى الشعرة من العجين .. ورقة بيضا يا أخواتى , ايه الحلاوة دى ؟

حكومتى العزيزة .. هل انتى هتتحملى تكاليف دواء الضغط اللى انتى جبتهولى ؟?

4 comments:

  1. لأ طبعا . . العلاج علي نفقة الدولة للي نهبوا الدولة بس :)

    الجماعة بتوع آسفين يا ريس هيقولولك ما هو عملنا مترو الأنفاق وكوبري أكتوبر . . علي كده رؤساء أمريكا بيسجدولهم في الكنايس . . حاجة عجيبة والله

    الأغلبية خلاص مش طايقة تشوف وشه وإسمه في أي حتة , يروح في داهية بقي

    ربنا يصبرنا علي ما بلانا

    ReplyDelete
  2. أهلاً أهلاً بيكي و الله في اللخبطة الحلوة دي

    هنسميها لخبطة ندوة !

    بجد بجد أسئلة ليس لها أي إجابات !

    يبدو أننا لن نحصل على إجابات ببساطة =(

    لازم نضغط و لازم نفضل في الشارع عشان يحنّوا علينا و يكلمونا بصدق !!

    حاجة غريبة بجد!

    آه ...أنا تعبت و اتجننت خلاص !!

    ReplyDelete
  3. مصطفى ..
    أه طبعا لازم أشرق و اعمل كل المطلوب عشان أتعالج على نفقة الدولة !!
    ماهو ماسك فى دووول ,, و بعدين على رأيك ماهو الرؤساء فى الدول التانية بيعملوا الحاجات دى
    و لما يمشوا أو ميمشوش .. مبيعقدوش يقولوا "يا أبناء وطنى .. انا عملت كذا و كذا " مفيش غيره عمل مثلا ؟
    أنا بجد لو شفت اسمه فى حتة متشالش .. هأسعى أن أشيلها بنفسى .. ربنا يصبرنا يارب !

    ReplyDelete
  4. سارة ..
    ههههههههههههه الموضوع تعدى كونه لخبطة .. بقى كارثة بجد
    لأن دى شوية من الأسئلة اللى ملهاش اجابة
    لازم نضغط .. يعنى ليه ميعملوش من نفسهم و لا لازم الفضايح يعنى !
    أنا أكتر و الله !!

    ReplyDelete