Thursday, July 14, 2011

Mischief Managed =)


10 سنين و أكتر من حياتى هيخلصوا فى ساعتين أو أقل ..

هارى بوتر بالنسبة لى كان أكتر من مجرد كتاب ممتع و فيلم مسلى كل سنة و خلاص .. القصة بالعالم ده اللى اندمجت فيه و تخيلتنى جزء منه أكتر فأكتر مع كل جزء من الكتاب .. شفت هارى و رون و هيرموينى و هم بيكبروا , شفت سيريوس و دمبلدور و جيمس و ليلى و سناب و غيرهم و هم بيموتوا .. شفت ناس شريرة بتبقى طيبة و ناس طيبة بتبقى شريرة , حسيته عالم مستقل بذاته و بقت هوجوورتس هى المكان اللى بحلم أزوره ..

هارى .. علمنى أنى أبقى شجاعة و مخلصة

رون .. علمنى أنى أكون وفية و أن الأصحاب اللى بجد بيفضلوا مع بعض

هيرميونى .. علمتنى أن الذكاء ميزة حلوة فى الشخص

جينى .. علمتنى أن يكون ليا كلمة و موقف

فريد و جورج .. علمونى أنى أضحك =)

دمبلدور .. علمنى أن عادى أن الشخص يغلط , المهم هيصلح غلطته ازاى

لونا .. علمتنى أن يكون عندى ثقة بنفسى

نيفيل .. علمنى أنك تقدر تكون أى حاجة أنت عايزها بس لو حاولت

بسببهم حبيت النضارات و الشعر الأحمر ,حبيت المدارس و الكتب و القراية , حبيت ان يكون عندى هوس بحاجة معينة طوال 11 سنة , و للأسف رغم أن أخر فيلم خلاص وصل

بالنسبة لى سحر هارى بوتر لسة مخلصش ..

الذكريات ممكن بعضها أنساه , ممكن انسى أجزاء كتيرة من القصة , ممكن مضحكش تانى على نفس الحاجات ,بس الحماس قبل كل فيلم و كتاب و الفرح و الحزن بعد كل نهاية مش هتتنسى , بالنسبة لى دى البداية ,  أنى هنقل الحكاية دى لأولادى ..

عارفة أن ناس كتير هتضحك , و فعلا فى ناس كتيرة ببتريق عليا عشان الموضوع ده بس انا مؤمنة ان هارى بوتر ده أخر جزء من طفولتى و ناوية أخليه يكمل معايا ان شاء الله ..

فيه ذكريات كتيرة خدتها من كل فصل فى كل كتاب و كل فيلم .. بس أهم حاجة ,

أنا فخورة انى كنت من جيل هارى بوتر

"Mischief Managed"

2 comments:

  1. جميل اوى انك حابه حاجه كده وفخوره بيها
    اول مره اعرف منك دلوقتى ان خلاص الجزء الاخير نزل
    انا كمان كنت من جيل هارى بوتر ومبهوره بالقصص قبل الافلام كمان

    نسيت اقولك مبروك على الاستايل الجديد للمدونه
    شكله جميل اوى

    ReplyDelete
  2. للأسف مفيش كتير بيشاركنى حبى لهارى بوتر و فى ناس أقل برضة شايفين الموضوع مش عادى
    معتبرينه هوس .. بس انا فرحانة بيه جدااا
    هو نزل بقاله كده 4 ايام تقريبا .. عايزة أروح أشوفه قريب
    بس الظروف بتأخرنى
    مبسوطة انك كنتى من جيل هارى بوتر كمان =)
    ميرسى يا جميلة أنتى أجمل
    الله يبارك فيكى .. حبيت أغير اللوك بتاعها ممكن تفك النحس بتاعى
    أنى مش عارفة أكتب حاليا :)

    ReplyDelete