Friday, February 1, 2013

هندي كوري ياباني .. مفيش مصري يا باشا؟


تلك اللحظة التي تنهي فيها فيلم رومانسي مفعم بالمشاعر وتنظر بجوارك تتوقع أن "الخيال" الذي كنت تشاهده هو حقيقة، وأنك ستجد من يقول تلك الكلمات بالضبط مثلما قالها ذلك الممثل لتلك الممثلة. ورغم أنك عارفة جداً جداً أنهم بيمثلوا ولكن هذا لا يمنعك من الإقتناع أنهم بعد الإنتهاء من الفيلم، كانا قد عاشا قصة حب حقيقية جداً.

شاهدت أمس فيلم (Rockstar) الهندي وهو إنتاج عام 2011 بعد إنقطاع فترة لا بأس بها عن الأفلام الرومانسية وخاصة الهندية، وبعد أن شاهدته تذكرت لماذا قاطعتها، لأنها أفلام، بكل بساطة.
لأن العالم المتوحش الذي نعيش فيه لا يعترف بالحب اللي بنشوفه، هو لا يعترف بالورود والصمت الجميل، لا يعترف بالهدوء ولا الجنون، فقط لأنه واقع.

طيب أكيد عارفين تلك اللحظة اللي بتكون بعد الفيلم المؤثر أو الأغنية المؤثرة أو أياً كان اللي بيأثر فيكم، وبعدها بتقعدوا ساكتي ومش عايزين تكلموا حد، لا غضباَ و لا حزناً ولا مشكلة شخصية مع حد شخص بعينه، ولكن على رأي محمد هنيدي في فيلم "فول الصين العظيم": عايز صوتها يبقى أخر صوت أسمعه قبل ما أنام.

هو ده!

بس محمد هنيدي بيصحى يلاقي الأنسة لي تاخده المسابقة، أنا بصحى على عالم روتيني قاسي ممل مفيهوش رومانسيتي الكورية الهندية اليابانية. أشوف كوري و أفكر "Too sweet"، طيب أشوف ياباني وأفكر "Too cute" ، أما الهندي أتفرج و أقول "Too romantic". أولع في نفسي طيب؟

...
-أنتي زعلانة؟
-لا مش زعلانة، هزعل ليه؟
-أنا حاسس أنك زعلانة.
-والله مش زعلانة
-أنا عارف أنك زعلانة.
-أنا بدأت أزعل .. بمعنى أصح أتضايق.
-شفتي؟
-.......
....

جربت في مرة تلقي نظرة خاطفة على الشارع، أي شارع، وهتشوف بنفسك أن أنا مش بتبلى علينا كبني أدمين. إحنا نفتقد الرومانسية، وفي الجو الغم ده، اللي عنده أي حس رومانسي هيفقده هو كمان بإذن الله. الحب بقى مصطنع، بقى عبارة عن كليشيه بدب أحمر بورد دبلان بكارت الكلام المكتوب فيه اتقال فيه 100 فيلم قبل كده. مفيش إبتكار! وهي الرومانسية إيه غير أنك تطلع المجنون –المبتكر- اللي جواك.

الرومانسية بقت واجب عليك، عشان ميتقالش عليك حاجة ولا عشان هو/هي ميزعلش/متزعلش فبتقول كلمة من مسلسل على كلمة من فيلم على كلام أغنية وأهي بتمشي.
إبتكروا في حبكم و عيشوا الرومانسية حتى ولو لوحدكم، متوصلوش لدرجة أنكم تشوفوا الفيلم الرومانسي و تناموا عشان عايزين أخر صوت تكونوا سمعتوه هو صوت ممثل ..

...
يمكن لو في بيني وبينك حكي، كنا حكينا ..
يمكن لو في بيني وبينك دمع، كنا بكينا ..
لو كان في طريق تودي، شوية شوية كنا مشينا ..
او كان في شي درب يوصل بيني وبينك كنا لقينا ..
يمكن لو في بيني وبينك قصص كنا قرينا ..
يمكن لو في بيني وبينك صلاه كنا دعينا ..
يمكن لو في بيني وبينك حلم كنا غفينا ..
يمكن لو في بيني وبينك سلم كنا نسينا ..
...

ولأني لا أجيد سوى نصح الأخرين ولا أجيد إسداء أي نصيحة لنفسي، فها أنا ذا، بطبق إندومي الدجاج أشاهد هذا الممثل يبكي حبيبته الضائعة، وأبكي معه. وأدري أن بعد خمس دقائق سيضحكون و يبتسمون وهم يخرجون من موقع التصوير .. وأنا أنام عشان مسمعش غير صوت الممثل.




8 comments:

  1. مفتقدين جدا للحس الرومانسي اه..
    نفتقد جدا لثورة الحب, واللة لسة الفكرة في دماغي من يومين يا رودي و غيرت الكوفر حتى كتوضيح لما يدور بذهني حاليا..."ثورة الحب"

    بالنسبة للافلام الدراما و الرومانسي بحبها جدا لكنني لا اطيق فكرة الافلام الهندي..بدأت اشك اني عنصري ضد الهنود !!!

    تدوينة جميلة كعادتك عود احمد :)

    ReplyDelete
    Replies
    1. الواحد لو متصرفش هيتحول لطوبة والله من قلة الرومانسية
      لكن الأفلام الهندي جميلة جداً جداً .. هي الأفلام القديمة كانت مملة ورخمة، لكن من أول سنة 2000 حتى الأن فيه مجموعة أفلام هندية رائعة، أفكار و دراما و تمثيل جربها ^^
      ربنا يخليك وأنا أسعد بالعودة

      Delete
  2. طبعا نظريه تحترم جدا .. للأسف دلوقتى اللى بيفكر في الرومانسيه بيتقال عليه سيس .. مش بسمن الناس اللى حواليه
    لا من اقرب الناس ليه
    الرومانسيه مش لحد معين لكنها ممكن تتعاش مع الناس كلها .. هى زى ما وصفتى بالظبط
    حاله كدا لازم نوصلها .. يمكن نقدر نطيق بعض عن كدا ونقدر نتقبل بعض اكتر من كدا

    تدوينه رائعه .. وان كنت اتحفظ على الافلام الهندى لأن كتيييييييييييييييير منها لا يحترم عقليتي كمشاهد .. مفكريني هندى :D

    ReplyDelete
    Replies
    1. أتمنى نقدر نوصلها أصلاً الحالة دي .. الرومانسية في رؤية الأمور أصلاً
      أنا الصراحة الأفلام الهندي بل كده كنت بتضايق من حاجات فيها و خصوصا القديمة لكن فيها أفلام كتيرة لطيفة :)

      نورتني :)

      Delete
  3. هههههههههههههههههههههههههههههههه
    والله يارضوي انا زيك كده طول الوقت بحس انهم كيوووت مووت
    واحنا عندنا جاموسة راحت تقابل جاموسة
    واما بيبقي نفسك تسمعي اخر صوت رومانسي قبل اما تنامي
    لازم حد يعكنن عليكي كده
    وعموما تدوينتك خفيفة ع القلب
    المجد للافلام الهندي

    ReplyDelete
    Replies
    1. هههههههههههههههه هي العكننة دي حاجة ضرورية في الحياة اليومية كده
      نورتيني بوجودك .. والأفلام الهندي جميلة أول فعلا :)

      Delete
  4. This comment has been removed by the author.

    ReplyDelete
  5. أنا كمان شوفت الفيلم دة كان فيلم رومانتك فعلاً
    عشان الكاتب في الغالب بيحاول يجمع كل حاجة حاسس انها عمرها ما حتتحقق
    و بيصنعها في قالب معين يحقق أحلام الناس:

    ReplyDelete