حـــدوتة بنــــت

حدوتة بـ نـ تـ..

كان فى بنوتة جميلة جدا .. كان الكل بيحسدها على جمالها و كان اسمها "...."

كان الكل بيحبها أووى , بس هى مكنتش بتحب غير اللى زيها .. الطيبين الجمال برضة , و دوول كانوا مش باينين , كل اللى كان باين الوحشين .. و دول برضة كانوا بيحبوها , بس مش عشان طيبة قلبها و لا جمالها .. دول بس ناس عايزين يستغلوها و بعدين يرموها و يقولوا هى وحشة من الاول

المهم , البنت دى من 30 سنة فى شبابها و جمالها , جه خادها راجل وحش خالض .. راجل قالها "أنا هخليكى أسعد بنوتة يا ...." و هى يا عينى عشان طيبة .. صدقته و مشيت وراه.

 و كل سنة ورا التانية هى كانت بتحس ان فيه حاجة غلط .. و كمان الناس الطيبين الجمال اللى كانوا بيحبوها كانو بيحسو كده برضة .. بس عشان الراجل الوحش ده جاب ناس وحشين زيه .. قعدوا يبهدلوا فى الناس اللى بيحبوا البنوتة دى بجد و فيها نفسها .. فالمسكينة استكانت على نفسها كده و رضيت بالامر الواقع.

المهم بعد 30 سنة .. جه ولد شهم و شجاع اسمه .... , و قال لها "أنا مش قادر أستحمل الى بيحصلك ده, أنا هتصرف و هخلصك من الراجل الوحش ده" .. هى قالتله "ازاى بعد 30 سنة؟ ده انا سمعته انه حتى لو مات , ابنه هيبهدلنى أكتر من كده كمان .. و بعدين انت ناسى الناس الوحشين اللى باعتهم فى كل حتة .. أنا خايفة عليك"

هو مهموش .. جمع كل اللى بيحبوها بجد .. و "احتشدوا" لمدة 18 يوم عشان البنوتة دى تعرف تخلص منه

هى دلوقتى الحمدلله خلصت منه .. بس لسة الناس الوحشين بتوعة لسة موجودين و هو لسة مستخبى

و هى دلوقتى قلقانة و مش عارفة هيرجع تانى امتى ..

انا عن نفسى مش عارفة عندى احساس ان الناس الوحشين دول هيساعدوا الراجل الوحش انه يرجع تانى

و كمان البنوتة حاسة كده ...