(صـوت الحـريهـ بينــادى .. (تاج الثورة

عادة مش بعمل تاج .. لكن عجبنى التاج اللى زينب عملته جدا

و قررت أنى أعملووو .. لانى لازم أقول رأيى فى ثورتنا بقى

لانى لاحظت انى لحد دلوقتى مكتبتش "مباشرة" عن الثورة .. ممكن لدواعى أمنية

لا ألاقيهم تحت البيت .. و ممكن أنى مستنية خبر معين عشان أكتب عنه

و مش هعتبر أن الثورة نجحت غير لو اتنفذ .. شغلوا دماغكو بقى و اعرفوا ايه هو ^^

.....

أين كنت أثناء مظاهرات 25 يناير ؟

يوم 25 يناير كنت فى البيت الصراحة لانى كنت لسة سامعة عن الايفنت قبلها بكام يوم و كانت معلوماتى عنها قليلة جدا .. و لما عرفت عنها يوم 25 مكنتش متخيلة انها هتعمل تأثير أو أن الاعداد هتكون كبيرة كده

يوم جمعة الغضب و ما تلاها . كان نفسى أنزل التحرير أكتر من أى حاجة تانية لانى كنت بدأت عايزة أشارك بجد و أقول أنا من الثورة دى بس للأسف مقدرتش أنزل .. كنت أيامها لا اما على الفيس بوك بشوف أخبار أو فاتحة التليفزيون متابعة .. تقريبا فى فترة الثورة دى كل يوم مكنتش بنام ساعتين على بعض.

...

هل كنت تتوقع أن تؤدى هذه المظاهرات لثورة؟

أيووووة طبعا و أوووى كمان .. الشعب زهق و كان وصل أخره و كان لازم ده اللى يحصل

30 سنة عذاب و فى كل مرة تحصل مظاهرات بسيطة يموتوها .. كان لازم يجى وقت و يقولوا خلاص بقى , و كانت المرة دى فعلا حسيت من أول يوم أنها هتعمل ثورة كبيرة اووى كمان

و للأسف كان فى ناس أعرفها بتشتم فى الثورة دى من بعد جمعة الغضب . أنهم بيضيعوا البلد و كده و مازالوا طبعا , بس أنا كنت و مازلت فخورة باللى قاموا بالثورة .. كانوا شجعان فى وقت احنا كلنا كنا خايفين

....

ماذا فعلت وقت انقطاع النت و الاتصالات ؟

دى كانت كارثة فعلا .. لانى متابعتى للموضوع كانت من خلال الفيس بوك معظم الوقت و على التليفون كمان مع الناس اللى نزلت و الناس اللى قاعدين فى أماكن تانية .. بس وقتها لما كل حاجة اتقطعت مكنتش بقوم من قدام التليفزيون ... 24 ساعة قدام الجزيرة أو العربية أو بى بى عربى .. كل واحدة منهم شوية

...

ماذا كان رد فعلك بعد إعلان تنحى مبارك ؟

ده أنا صرخت و رقصت و ضحكت ... ^_^

مكنتش مصدقة نفسى أن الراجل ده خلاص كده (رغم انه لسة كابس علينا و محصلوش حاجة) بس مكنتش مصدقة انه هيروح فى داهية خلاص ..قعدت أتنطط بجد و كنت وقتها قاعدة زهقانة بعد ما قالوا قبلها انه هيتحى و طلع قال كام كلمة هبل كده فجالى اكتئاب .. بس لما سمعت انه اتنحى جبت ماما و قعدت اصرخ جنبها " اتنحى يا مامااااااااااااا .. راح فى 60 داهية"

....

ما شعورك تجاه إستمرار وجود مبارك فى شرم الشيخ ؟

قـــــــــلة أدبــــــــــــ

يعنى ايه الراجل بيرفض ؟؟ ايه قلة الادب دى ؟؟

انا اصلا مش مقتعة بمبدأ انه متحاكمش لحد دلوقتى .. و لا انه يقعد فى شرم الشيخ و فى مستشفى و نفقة علاجه وقعاده هناك على مين ؟ مش احنا ؟؟ و كمان مش مقتنعة بالتحقيقات اللى كمان هتتعمل فى شرم الشيخ

ده استهبال و استعباط .. و احنا شوية طراطير بقى !!

....

هل تفاجئت بحجم فساد النظام السابق ؟

لا متفاجئتش .. لانى كنت عارفة ان فى بلاوووووى و متأكدة ان فى كمان حاجات لسة منعرفهاش و ناس كمان لسة متكشفوش .. دى 30 سنة فساد .. مش قليلين !!!

...

هل غيرت الثورة شئ فى داخلك ؟

أيووووووووة أكتر مما كنت أتخيل !!

مصر دى كان نفسى أسافر و أسيبها ... دلوقتى بقيت بحبها أكتر من أى مكان تانى على الارض و عايزة أحافظ عليها و أفضل فيها و أعلى منها كمان و كمان ... و خلتنى أهتم بالسياسة و لو حبة حبة و أنا اللى قبل كده كنت ضايعة فيها ..  و بدأت أهتم بالبرامج الحوارية و الناس اللى بتتكلم أكتر و منهم يسرى فودة و ريم ماجد

...

هل لديك تفسير للانفلات الامنى ؟

عدم الثقة و الامبالاة بالنسبة للشرطة ... و انتهاز الفرصة بالنسبة للبلطجية

الشرطة الناس مبقتش وائقة فيها .. و الشرطة نفسها دلوقتى حبة عندهم انعدام ثقة بعد ما كل المنظرة بتاعتهم راحت دلوقتى و حبة عندهم لامبالاة "مش أنتوا اللى عملتواالثورة .. اولعوا بقى و احموا نفسكو احنا مالنا" و ماشيين بالمبدأ ده .. و طبعا الحالتين خلو البلطجية تطلع و تزداد أكتر بقى

...

مصر رايحة على فين ؟

أنا نفسى مش عارفة بس متفائلة ان شاء الله خير

ربنا اللى خلانا نعدى 18 يوم بالصبر و ان احنا وقفنا مع بعض .. لو رجعنا نقف مع بعض تانى هنعدى بمصر ان شاء الله .. بس يارب الناس تفهم الحتة دى.

...

فى رأيك من هو "أحد قيادات الجيش" الذى يتصل دائما ببرنامج أخر كلام ؟

يكونش من الثورة المضادة xD

أهو واحد منهم و خلاص ..

...

كان شعورك ايه لما الجيش نزل يوم جمعة الغضب ؟

انا مكنتش أعرف ايه ممكن يحصل لو الجيش نزل , بس ماما رعبتنى و قالتلى انهم هيبهدلوا الناس و هتقلب حكم عسكرى و مش هنعرف نخرج من البيت .. بس لما سمعت الشعب بيهتف "الجيش و الشعب ايد واحدة" و بتوع الجيش فرحانين و بيسلموا عليهم و الشعب بيصقفوا كل ما دبابة تعدى و يوسعولها .. اتطمنت

أما دلوقتى .. مش عارفة

...

أكتر صورة شايفها بتعبر عن الثورة ؟

 

...

ايه الاغنية اللى أول ما بتسمعها بتفتكر أيام الثورة ؟

ازاى لمنير .. و يا بلادى لرامى جمال

و طبعا الاغانى القديمة بتاعتنا .. اللى أول مرة أحس بمعنى "أغنية وطنية" وقتها بجد.