قررت أكتب النهاردة حاجة مختلفة .. فقلت بما انى لسة مخلصة دراما يابانية ..
أعرفكم عليها و أتكلم عنها شوية .. هى اسمها Hana Yori Dango و معناها بالانجليزى Boys Over Flowers .. طيب يعنى ايه برضة ؟ المعنى اللى يتفهم منها أنك تختار الحاجة مش على أساس المظهر اللى هو Flowers المفروض بقى :)
هى دراما يابانية .. معمولة على جزئين و فيلم , الجزء الاول 9 حلقات و التانى 11 حلقة (معظم المسلسلات اليابانى عاملة كده . حلقات قليلة ) , نوعها رومانسية/ كوميدية .. على شوية اكتئاب محترمين .. بس النهاية حلووة أووى و سعيدة الحمدلله يعنى .. و هى مبنية على قصة يابانية (Manga) .. و اتعمل منها نسخة كورية و نسخة تايوانية .. المهم نشوف القصة
القصة :
بتتكم عن بنت فقيرة , باباها و مامتها موظفين و عندها أخ أصغر منها .. و هم عيلة فقيرة جدا لدرجة فى معظم الاوقات بتضحك .. المهم هى هتدخل مدرسة للأغنياء فقط .. و نوعا ما أهلها بيقدروا يوفروا مصاريف المدرسة و ده بالتالى بيؤثر على حياتهم ..
Inoue Mao As Makino Tsukushi
البطلة .. أنا عجبنى تمثيلها أووى مناسبة للدور و مقنعة جدا , تسوكوشى البطلة فى 2 ثانوى فى الجزء الاول و فى الجزء التانى فى 3 ثانوى و حلمها تبقى محامية .. طيبة جدا و طيبتها دى اللى دخلتها فى ده كله .. لما هتتحدى الـF4 أو Flower 4 اللى هما الابطال .. هم عبارة عن 4 أولاد , متحكمين فى المدرسة تحكم كامل , لاسباب كتيرة , منها أنهم من أغنى العائلات فى اليابان أو لأنهم تقريبا المدرسة دى بتاعتهم
Matsumoto Jun As Domyougi Tsukasa
قائد الـF4 و أعنفهم .. شخصية فى الاول تكرهها , لالازم اللى هو عايزه يحصل فى ساعتها و الا بيبدأ يضرب أى حد قدامه .. لحد ما هيتعرف على تسوكوشى , هيتغير تماما و على حسب كلام أصحابه هيرجع بنى أدم تانى .. هو الوريث لشركات Domyougi و ده هيدخله فى مشاكل كتيرة مع مامته اللى معترضة على علاقته بتسوكوشى.
Oguri Shun As Hanazawa Rui
هو حب تسوكوشى الأول و هو هيبدأ يحبها بس هتكون هى حبت تسوكاسا (لازم ده اللى يحصل مش عارفة ليه يعنى) المهم هو الهادى الرزين اللى فيهم .. و الصراحة أنا معجبة بيه جدا , مش عشان حلو و لا حاجة يعنى , بس شخصيته عاجبانى جداااا ..
Matsuda Shota As Nishikado Soujiroh
ده بقى المفروض الصايع اللى فيهم .. أكتر واحد بتاع بنات يعنى .. (مش عارفة عندهم مبدأ كده اللى هو مادام غنى لازم تبقى بتاع بنات .. الواد شكله برئ خالص) المهم قلب بتاع بنات يعنى عشان كان بيحب واحدة و هى مشيت و سابته .. فاتعقد ياعينى بس هو دايما بتاع النصايح و الكلام الكبير ^^
Abe Tsuyoshi As Mimasaka Akira
ده حاسة أنه مهمته أى خناقة تحصل هو اللى يوقفها .. عده عقدة من البنات الصغيرة و طبعا مش هحرق ليه فى حالة أنه حد هيشوفه فبيحب أى واحدة أكبر منه ..طيب أوووى وأكتر واحد بيحب يساعد فعلا
...
طبعا فى شخصيات كتيرة بس دول الاساس .. بس الدراما رائعة بعد ما تسوكوشى تتعرف على كل واحد فيهم و تبدأ تقرب من تسوكاسا و تحبه .. مامته هتبدأ تتدخل و تعمل المستحيل عشان ميقربوش من بعض ..و هى الصراحة أنا كنت كارهاها كل الحلقات و مازلت بعد ما خلص مش بحبها فعلا
بس الرومانسية اللى فيه تحفة بجد .. و نوع يخليك تزعل و الله .. و قابلتهم كمية مشاكل تخلى الواحد يكره الحب بس برضة فضلوا مع بعض
أنا بنصح أى حد عايز يجرب حاجة حلوة و جديدة يشوفها .. و لو حد فعلا عايز يشوف الحلقات ممكن أحط لينكات التحميل
No comments:
Post a Comment