( 6 - 6 - 2010 )
خالد سعيد .. شهيد و الشرارة التى أشعلت فتيل الثورة
خالد سعيد .. شاب برئ تعذب و تشوهت ملامحه على يد الشرطة فى الاسكندرية منذ عام مضى ..
شاب تشوهت سمعته فى كل الجرائد على أنه مات بسبب "ده مدمن و بيشرب بانجو"
شاب انطلقت باسمه صفحة "كلنا خالد سعيد" التى نظمت لاول بداية لثورتنا العظيمة
شاب ..تعرض لظلم حكومة مبارك و بطش العادلى و قسوة أمن الدولة و قلة أدب الشرطة و تزوير الطب الشرعى و استهتار الوسائل الاعلامية بتشويه صورته و سمعته
شاب .. كان فى قلوبنا أول ما الثورة قامت و لحد دلوقتى بنفتكره
افتكرناه و احنا عايزين نرمى مبارك .. افتكرناه و احنا عايزين نولع فى أمن الدولة .. افتكرناه و احنا عايزين نخلص من السباعى الكداب .. افتكرناه و احنا بنحاول نطلع الشرطة نظيفة (بلا جدوى طبعا و الدليل الازبكية ) .. افتكرنا قبل و أثناء و بعد الثورة
خالد سعيد .. شاب موتوه كتييير .. موتوه لما عذبوه و شوهوه .. موتوه لما الطب الشرعى كشف عليه و قالولك دول شوية بانجو .. موتوه لما الاعلام يجى يقولك ده مات من الباجو .. موتوه لما الشرطة تفضل لحد دلوقتى بتعمل نفس اللى كانت بتعمله فيه .. موتوه لما لحد دلوقتى مش عارفين نجيبله حقه من اللى موته !!
خالد سعيد .. مكنش واحد اتقتل ظلم .. ده شعب بأكمله بيموت كل يوم حتة منه و مش بيتكلم
خالد سعيد مهما كان .. مكنش يستاهل أن ده يحصله , تعذيب و ضرب و تشويه و تزييف للحقائق !!
ده لو كان مجرم من بتوع الايام دى .. كان زمانه قاعد فى شرم أو فى بورتو "...."
مش هقول أكتر من.. الله يرحمك يا خالد سعيد
أنت فجرت غضب شعب ..
و ان شاء الله حقك هيرجع أنت و كل شهدائنا .. لو فضلنا سنة اتنين تلاتة .. مش مهم هنرجعه ان شاء الله
إنا لله و إنا إليه راجعون ..
No comments:
Post a Comment