نفســى و نفســى و نفســى ...

كلنا فى حاجات نفسنا نعملها .. صح ؟؟

و الحاجات دى لا اما بنحلم بيها من غير ما نحاول نعملها .. أو بنبدأ نسعى ان احنا نعملها فعلا ..

أنا عندى حاجات كتييييييير نفسى اعملها .. و أكتر من نصهم تقريبا مستحيل ..

و معظمهم لسة بدرى على ما أفكر أعمله ..

و دى شوية حاجات أنا نفسى أعملها/نفسى تكون عندى ..

1-     نفسى أسافر لبلاد كتيرة جدا : اليابان , كوريا الجنوبية , فرنسا ,إيطاليا , تركيا , أستراليا , بريطانيا ..

2-     نفسى يكون عندى كريديت كارد unlimited  أشترى بيها و بس .. من غير ما أدفع تمنها

3-     عربية بينك صغيرة على قدى و نفسى أتعلم السواقة كمان

4-     بيت جميل و صغير على البحر .. و يكون  على شاطئ كده مفيش عليه حد غيرى .. عشان أحس بجماله كده لوحدى ..

5-     نفسى فى بنوتة صغيرة جميلة ان شاء الله

6-     نفسى أشتغل شغلانة حلوة و بحبها ..

7-     نفسى أقابل مشاهير كتير : فيروز , Rupert Grint , Enrique Iglesias ,,, و غيرهم كتير

8-     أحضر حفلة :)

9-     أحافظ على كل أصحابى القريبين منى مهما انشغلنا

10-  نفسى أولادى ان شاء الله يبقوا ناجحين فى حياتهم .. و مؤدبين عشان متعبش معاهم

11-  أرجع طفلة صغيرة تااااانى .. و ألعب براحتى و أتصرف على طبيعتى براحتى

12-  أشوف كل الافلام اللى بحبها فى السينما

13-  نفسى أتعلم حاجات كتيرة : أتعلم لغات تانية , أعزف على آلة موسيقية , أتعلم مهارات و أساليب كتابة مختلفة ...

14-  نفسى أروح ديزنى لاند .. اكتر من مرة ^^

15-  نفسى أروح هوليوود و أقابل المشاهير هناك و أتصور معاهم , و أروح متحف الشمع اللى هناك اللى معمول فيه تماثيل شمع للممثلين ^^

16-  نفسى فى ايبود مساحته 1000 جيجا .. طماعة أنا صح

17-  نفسى أقابل أصحاب قدام أوووى من أيام المدرسة .. كتير معودتش بشوفهم و نفسى أشوفهم تانى

18-  أروح مكان فى ثلج .. و أعمل رجل الثلج ده

19-  عايزة أروح أشترى حاجات و بعدين أعدى على جوزى فى الشغل ..

20-  نفسى فى طقم ألبسه محسش أن فيه حاجة غلط ..

21-  أقابل ناس من اللى بعرفهم من النت و أشوفهم عاملين ازاى على الحقيقة

22-  أكون زوجة , أم , أخت , ابنة , صديقة صالحة 

23-  أكل أكلات جديدة و غريبة و مجربتهاش قبل كده

24-  أشوف عجائب الدنيا السبع . الجديدة و القديمة كلها

25-  أزور أماكن حرب .. و أشوفها عاملة ازاى دلوقتى

26-  أعيش لحد ما أشوف أحفادى بيتخرجوا .. (ده بإيد ربنا طبعا بس نفسى و الله )

27-  ألعب لعب جديدة

28-  أركب القطر السريع "الطلقة" اللى فى اليابان ده

29-  نفسى أروح الفضاء .. و أبص على كوكب الارض

30-  أغير كل أو معظم صفاتى الوحشة

31-  نفسى أختفى يوم  كأننى مت , و أشوف مين اللى هيزعل عليا و ازاى

32-  أحافظ على صفاتى الحلوة و شخصيتى من غير ما حاجة تبوظها

33-  نفسى أرقص تحت المطر زى ما بيعملوا فى الافلام

34-   نفسى أروح جامعة من الجامعات العريقة زى هارفرد و أخد جولة فيها كده بس

35-  نفسى أدخل مكتبة عامة محترمة برة كده و أقعد أقرا فيها كتيييييييير

36-  أشوف برنامج لايف

37-  أحضر مهرجان أو احتفال كبير أوووى

38-  أسافر أكتر من 4 ساعات على طيارة

39-  أجرب أسافر من دولة لدولة بالقطار

40-  أعرف أشوف شروق و غروب .. و يكون على البحر كمان

41-  أتعلم رياضة جديدة

42-  أروح فى رحلة بحرية طويلة

43-  أركب على جمل

44-  أشوف حوت و دولفين و بطريق .. على الحقيقة

45-  أربى قطة صغيرة بيضاء و عسولة عندى فى البيت .. تانى

46-   أمر بتجربة أكشن/رعب زى اللى بتحصل فى الافلام دى .. و أخرج منها سليمة و منتصرة و موسيقى تشتغل فى الخلفية

47-  أعيش حياة أسرية سعيدة ان شاء الله  .. مع اللى بحبه

48-  ألبس كيمونو و هانبوك (الازياء الرسمية لليابان و كوريا)

49-  أطلع على قمة جبل

50-   أشوف حدث طبيعى خرافى (.. بس ميكونش مؤذى)

51-  أمر بتجربة روحانية تغير فيا

52-  أركب فيل

53-  لما أكبر .. أولادى يفضلوا يهتموا بيا و أكون صاحبتهم و أختهم أكتر من أنى مامتهم و يبعدوا عنى

54-   نفسى مخافش من الصراصير

55-  نفسى أروح لدكتور نفسى و أقعد على الشيزلونج و اقعد أتكلم و يقولى وقتك خلص

56-  نفسى أبقى كاتبة

57-  نفسى أروح الحج

58-  نفسى أعيش لوحدى حبة فى بيت أحسه كله من زوقى أنا

59-  نفسى أبطل أكون عصبية

60-  نفسى حد معين يفهمنى بجد ..

61-  نفسى أعمل برنامج فى الاذاعة

62-  نفسى أحضر حاجات كتيرة فى الاوبرا و أخرج حاسة انى استفدت حاجة

63-  نفسى أكون ولد ليوم .. و أشوف بيفكروا ازاى

64-  نفسى أقول لأ للناس لو أنا عايزة أقول لأ

65-  نفسى أسوق موتوسيكل .. أو أكون مع حبيبى و هو سايق موتوسيكل و أحضنه

66-  نفسى أقدر أقرأ أفكار الناس ( أكتر قوة خارقة نفسى فيها)

67-  نفسى أساعد كل الاطقال اليتامى و أطفال الشوارع و الدول تبدأ تهتم بيهم أكتر

68-  نفسى أفتح محل ورد صغير

69-  نفسى أنجح فى حياتى المهنية بجد

70-  نفسى ألعب لعبة البحث مع الكنز مع ناس عزيزة عليا أووى

71-  نفسى أرتاح و أبطل قلق و توتر و كتر تفكير

72-  نفسى أقرب من ربنا أكتر

73-  نفسى أتعلم أرقص

74-  نفسى أغير لون شعرى .. خاااااالص

75-  نفسى يكون عندى اختراع آلة الزمن .. ده أنا هعييييييييش

76-  نفسى أبقى مثقفة جدا و عارفة حاجات كتيرة اوووى و أقرا كتيييييييير

77-   نفسى أعرف هم الممثلين بيعيشوا ازاى .. يوم من أيام حياتهم العادية اعمل ازاى

78-  نفسى بعد ما أتجوز ان شاء الله .. اللى بحبه يفضل بيحبنى ميتقلبش 180 درجة

79-  نفسى أروح قلعة

80-  نفسى أكون أميرة ليوم واحد

81-  نفسى أبطل أخاف من الحقن و أتبرع بالدم

82-   نفسى أغنى فى  حفلة

83-  نفسى أروح فى رحلة تخييم مع أصحابى

84-  أكتب كلمات أغنية

85-  أبعت رسالة فى زجاجة .. (الموضوع عاجبنى و حاساه رومانسى)

86-  أنقذ حيوان أو انسان من الموت

87-  أدخل بيت بيتقال أنه مسكون و فيه أشباح

88-  أساعد الاطفال العيانة .. و يا سلام لو خليتهم يضحكوا

89-  ألبس فستان مصممه ناس من الناس المشهورة دى

90-  أشوف مذنب

91-  أغير حياة شخص للافضل

92-  نفسى انام و أنا براقب النجوم

93-  نفسى أجيب منظار و أقعد أراقب النجوم و الكواكب

94-  نفسى أقرب من حد وحيد و مش بيصاحب حد .. هحس انى عملت انجاز

95-  نفسى أتغلب على كل أو حتى معظم مخاوفى

96-  أتبنى طفل يتيم .. بس ميكونش زى أفلام الرعب لأن معظمها بيكون الأطفال اليتيمة بيموتوك و يطلعوا أشرار

97-  أشوف شلال

98-  أستلم جايزة

99-  أقرأ كتاب قديم و قيم أوووى

100-  ألاقى مكان سرى محدش يعرفه و ياريت تكون حديقة جميلة كلهاااااااا وروود

101- أعمل جنينة و أزرع فيها

102-   نفسى حد يرسمنى

103-   أحضر محاكمة

104-  أكتب اسمى على الاسمنت و أستناه ينشف و أشوف ان اسمى هيفضل موجود كده

105-  أتعلم ألعب شطرنج

106- أحقق أحلامى

107-  نفسى أكتب حاجة و أشوفها منشورة

108-  أحضر أفراح أصحابى .. كلهم

109-   أتعلم أخيط

110- أتصل بجوزى من البيت و هو فى الشغل أطمن عليه و أساله هيجى امتى و عايزنى أعمله انهاردة ايه .

111-   أروح المدينة بتاعت هارى بوتر و أقابل جى كى رولينج و يا سلام لو بقية الممثلين.

كتيييير صح .. معظمها حاجات ممكن متحصلش أبدا بس بحب أتخيل مع نفسى أنى أقدر أعمل الحاجات دى كلها .. 

رغم أن فى حاجات كمان بس كفاية كده ^^