Monday, June 20, 2011

إحتــرم نفســـك. شكرآ.


20 يونيو .. يوم التدوين ضد التحرش الجنسى

يعنى إيه بنت/ أنثى ؟

يعنى مخلوق جميل و رقيق و ضعيف , ممكن يبقى عنده صفات وحشة و كتيرة , لكن عمره ما المخلوق ده يستاهل اللى بيحصله .. سواء كان عنف أو تحرش , كل بنت بتحلم بحاجات كتير منها ان الناس تحترمها و تقدرها , حتى لو مش بتبين ده , سواء كان فى تصرفاتها أو لبسها , واجبها عليك تنصحها مش تتحرش بيها يا محترم .

يعنى إيه تحرش ؟

ده مرض !! أه و الله مرض لأنى مش لاقية تفسير لتصرفات دى اللى بتخلى الواحد من دول مفيش فرق بينه و بين الحيوانات , مبسوط بنفسك و أنت بقيت مفيش فرق بينك و بين الحيوانات ؟ مبسوط أنك بتحط أختك أو مامتك أو حتى اللى هتتجوزها فى موقف أنت بتعمله فى بنات تانية .. تخيل كده لو هما اتعرضوا للموقف ده ؟ لو عندك دم هتتضايق على الاقل لو متضايقتش ده موضوع تانى و محتاج دكتور يعالجك يا بابا..

المهم التحرش ده سواء نظرات و فى أغلب الاوقات مباشرة (الأستاذ لازم يوصل للبنت أنه مراقبها) و بتوصل للكلام القليل الأدب , و المرحلة الأخيرة الهجوم .. و هنا بيكون عايز اعدام الصراحة ... و خصوصا لو حالات تحرش جماعى .. اللى فى مصر بتبقى عاملة زى المواسم و الاعياد .. ليها أوقاتها فى السنة و بيكون مثلا شم النسيم و العيدين و أى أوقات فراغ للمخلوقات الضالة دى (اللى بيعاكسوا) .. طبعا حالات التحرش الجماعى دى بتبقى غالبا عشرات و وصلت لمئات و الله من الكائنات الضالة و بتكون على بنت أو بنتين أو تلاتة بالكتير !! .. تخيل بنت ضعيفة مهما كانت وحشة لما يتجمع عليها 100 أو حتى 10 ولاد ايه الاذى النفسى و المعنوى بعيدا عن الجسدى اللى ممكن يحصلها .. هسيبك تفكر ..

ليه بيتحرشوا ؟

طبعا المخلوقات الضالة دى عندها نظريات لولبية كتيرة جدا .. و أولها (البنات بتحب تتعاكس) .. لا يا رااااااااااااااااااجل .. أه صحيح شهم شهم يعنى بيحب يسعد البنت .. مين اللى يا "صفااااااارة" قال أنها بتحب تتعاكس ؟؟ "ما هى بتضحك لما بعاكسها " آآآآآه .. طيب افرض ضحكت ؟ هى مش محترمة يا أخى تقوم أنت تدى لنفسك الحق أنك تزودها بقى .. ده أنت صحييح "صفاااااارة تاااانية"

فى نظرية تانية لولبية .. (هما اللى بيستفزونا بلبسهم) .. يعنى أنت لو شايف واحدة لابسة ضيق بيبقى هيغمى عليك و تعاكسها .. أنت ماااااااااالك يا أخى ان شاء الله حتى تمشى فى الشارع مش لابسة حاجة ده شئ يرجعلها و أنت ميخصكش فى أى حاجة و حاجة تانية للاخوة الكلاب الضالة اللى بيعاكسوا و يقولوك اللبس .. بالنسبة أنكوا بتعاكسوا بنات منقبة ؟؟؟ ايه اللى بيستفزكو فى ده بقى . .أمووت و أفهم .. و بالنسبة أنكوا بتعاكسوا أمهات محترمة ماشية فى الشارع مع ولادها .. برضة علل يا "صفاااارة تاااالتة"

فى كلام كتير يتقال عن التحرش ده بس اللى أنا متأكدة منه أنه مرض و فراغ و قلة أدب

و أنا شايفة أنه من حق أى بنت أنها تمشى فى الشارع من غير ما تخاف انه فى واحد هيضايقها أو هيتحرش بيها ..

لو سمحت احترم نفسك. شكرا .. و افتكر أن أى أختك أو خطيبتك ممكن تبقى فى نفس الموقف

هتحس بإيه ؟

5 comments:

  1. ده مرض وقلة ادب وموضوعك حلو جدا بس ياريت الكلاب دي تفهم وتبطل

    ReplyDelete
  2. ياريت و الله الحيوانات دول يفهموا و يبطلوا .. بس أشك على المدى القريب هيعملوا حاجة
    ده مرض و متأصل فيهم بطريقة فظيعة !!
    شكرااااا ليكى :)

    ReplyDelete
  3. عَارفَه يا رَضوى ..
    العِيب لآ يقع عالمُتحرش بس ..
    لإن الضحِيَّه .. مش دايماً ضَحيَّه اصلاً ..
    ..
    عشان نِصلح بِجد ..
    لآزم يبقى فيه تغيير م الإتنين ..
    :)
    تغيير من جوا أكتر من برآ ! :)

    ReplyDelete
  4. عارفة كنت عايزة اكتب يوم 20 كمان
    بس مكنتش هاكتب حاجة تعبر عن اللى جوايا زى التدوينة دى

    عجبتنى وبشدة
    :)

    ReplyDelete
  5. اوقع لفظ اتقال .. كلاب ضالة ...
    يعنى ايه يوصل بيا الحال انى ابقى مراقبة ايد كل واحد ماشى جنبى لا يستغل انى باصة قدامى ويقوم خابطنى فى اى حتة ويمشى بسرعة كأنه مش قاصد ؟؟
    يعنى ايه اضطر امشى فى حتة زحمة وابقى بفادى فى الناس بالعافية وفجأه الاقى واحد عامل لى فيها اهبل ويقوم خابطنى بالكوع فى اى حتة ؟؟؟

    الكلام كتير .. والكلاب أكتر

    ReplyDelete